Ministri i Brendshëm, Fatmir Xhafa, deklaroi se në Kavajë ka pasur grupe të posaçme që kishin përgatitur trazira në Kavajë dhe policia ka bërë ndalime të disa personave.
Megjithëse Xhafa nuk ka dashur të japë detaje, në intervistën e dhënë për Sokol Ballën në Top Story, tha se ka pasur të dhëna konkrete nga agjencitë e vendit dhe shërbimet partnere se në Kavajë do të kishte trazira nga disa elementë jashtë strukturës së protestës.
Fatmir Xhafa, deklaroi se ka pasur një alarm të posaçëm edhe nga Shërbimi Informativ Shtetëror për Kavajën, por edhe për raste të tjera pasi ka sinjale të qarta se bëhet fjalë për një plan për destabilizimin e rajonit dhe Shqipërisë.
Xhafa u shpreh se ka disa qendra që duan destabilizimin e vendit, si ISIS apo edhe qarqet që nuk duan që Ballkani të futet në strukturat euroatlantike.
Ministri i Brendshëm ka sqaruar edhe masat e sigurisë ndaj kreut të PD-së, Lulzim Basha, kur deklaroi se nuk ka pasur një kërcënim direkt ndaj tij, por ka pasur një sinjalizim i ardhur nga SHISH.
Në lidhje me protestën e 13 majit, Xhafa deklaroi se policia do ta ndjekë me vëmendje atë dhe akuzoi krerët e PD-së se kanë lëshuar deklarata të papërgjegjshme.
“Nëse në protestë do të ketë tentativë për dhunë policia do t’i përgjigjet ashpërsisht personave që kryejnë, nxisin apo organizojnë dhunë ndaj institucioneve dhe qytetarëve”, – ishin fjalët e Fatmir Xhafës./tesheshi.com/
