Nga Blendi Gashi
Avni Arifi nuk është më kryesues i qeverisë së Kosovës për dialogun me Serbinë. Befasisht në këtë pozitë është emëruar nga qeveria të hënën zv.kryeministri, njëherit kreu i NISMA-s, Fatmir Limaj.
Zëvendëskryesues i delegacionit është propozuar zv.kryeministri nga PDK, Enver Hoxhaj, ndërsa anëtarë të delegacionit janë propozuar ministri i Punëve të Jashtme Behgjet Pacolli, ministri i Administratës Publike Mahir Yagcilar, ministri i Diasporës Dardan Gashi si dhe kryesuesin e deritashëm të dialogut Avni Arifi.
Kryeministri Haradianaj në mbledhjen e qeverisë ka thënë se me këtë po i dërgojmë njerëzit e ekzelutivit për dialog me Serbinë.
“Si qeveri me këtë delegacion po marrim përsipër dhe përgjegjësitë tona për dialog. Kjo është një mundësi e mirë që qeveria ta kryejë punën e vet dhe Parlamenti punën e vet”, deklaroi Haradinaj.
Përmes kësaj deklarate Haradinaj sikur dëshiron t’ua mbyllë gojën LDK-së së Isa Mustafa e Vetëvendosjes së Kurtit që parreshtur e akuzojnë kryeministrin për ikje nga përgjegjësia për të marrë rolin udhëheqës në bisedime.
Përkundër kësaj emërimi i Limajt vështirë se mund ta zmbraps LDK-në e VV-në nga kundërshtimet, pasi këto parti asnjëherë nuk ka pasur problem me Avni Arifin që ka qenë kryesies i bisedimeve.
Kërkesa e tyre është pse Ramushi si shef qeverie po e pranon Thaçin të jetë kryenegociatori, pasi besojnë fuqishëm se me idenë e tij për korrigjim të kufirit do e ndajë Kosovën.
Andaj zëvendësimi i Arifit me Limajn nuk do ndalë kundërshtimet e LDK-së e VV-së, por me gjasë vetëm sa do i rritin ato, me ç’rast pritet ta akuzojnë kryeministrin për ndryshim të figurave e jo marrje të përgjegjësisë.
Në anën tjetër mund të plasin reagime edhe ndaj Limajt që ka pranuar të bëhet shef i unitetit të bisedimeve, pasi do vlerësohet se ai ka “rënë” në kurthin e Thaçit duke marrë këtë pozitë.
Edhe pse Haradinaj ka lënë të hapur që në këtë “ekip të unitetit” të marrin pjesë nga një përfaqësues nga partitë opozitare: LDK, VV, PSD dhe Alternativa, e përveç tyre edhe përfaqësues të shoqërisë civile, kjo vështirë se do pranohet.
Kujtojmë se emrat e delegacionit fillimisht i propozohen Kuvendit të Kosovës për miratim.
