Nga Blendi Gashi
Veriu i Kosovës, konkretisht komunat që udhëhiqen nga komuniteti serb, si Mitrovica Veriore, Leposaviqi, Zubin Potoku, etj, edhe 17 vjet paslufte vazhdojnë të mbesin një terren i pashkelur për shumicën e politikanëve kosovarë.
Përveç që flasin me nostlagji për veriun dhe shprehin “dhembjen” për banorët shqiptarë që jetojnë në këtë pjesë, asnjëherë nuk e marrin mundin të shkojnë atje për të parë nga afër se me ç’probleme të përditshme ballafaqohen ata.
Megjithatë ka edhe të tillë politikan që nuk i harrojnë banorët shqiptarë që jetojnë në komunat e veriut dhe çajnë kokën për hallet e tyre të përditshme. Bëhet fjalë për Fatmir Limajn, i cili brenda këtij viti ka vizituar dy herë Leposaviqin me fshatra, ku nga afër ka dëgjuar hallet e banorëve shqiptarë.
Vizita e parë nën petkun partiak
Limaj vizitën e parë sivjet në fshatrat e veriut e bëri më 6 qershor, pesë ditë para zgjedhjeve parlamentare të 11 qershorit, ku vizitoi konkretisht fshatrat e Cerajes, Koshtovës e Vllahisë.
Ai me këtë rast u premtoi kujdesin e shtetit, konkretisht investime të fuqishme në bujqësi dhe blegtori në atë pjesë.
Vizita e dytë si drejtues shteti
Kreu i NISMA-s, katër muaj më vonë edhe nën petkun e zv. kryeministrit shkeli sërish në Leposaviç për t’iu thënë banorëve se nuk i ka harruar dhe do kujdeset për ta ashtu siç ka premtuar. Ai saktësisht më 10 tetor vizitoi sërish fshatrat Koshtovë e Cerajë që ishte edhe në qershor si dhe fshati Bistricë me ç’rast u premtoi banorëve se do ta ndjejnë dorën e shtetit.
“Fshatrat e Leposaviqit nuk e kanë ndjerë dorën e shtetit deri më tash. Por kjo gjë do të ndryshojë. Është për keqardhje që shteti nuk ua ka ofruar kushtet elementare për jetesë”, ka premtuar Limaj.
Në cilësinë e zv.kryeministrit, ai është zotuar para banorëve të këtyre fshatrave se do të angazhohet për plotësimin e kërkesave të tyre, disa prej të cilave janë, asfaltimi i rrugës dhe rregullimi i çështjes së transportit. Limaj u bëri një kërkesë banorëve të këtyre fshatrave.
“Mos i braktisni shtëpitë, pasi shumë shpejt do t’i shihni rezultatet e para”, është kërkesa njëherit premtimi i dhënë nga Limaj, duke lënë të kuptohet se qeveria e re nuk do bëjë gjumë, por do të ofrojë përkujdesje për këta banorë të cilët edhe pse jetojnë në gjendje jo të mirë sociale nga paslufta, asnjëherë nuk u dorëzuan dhe nuk u shitën serbëve pronat e tyre.
Premtime që japin shpresë…
Vizita e tilla nga drejtuesit e shtetit në fshatrave e komunave veriore ku jetojnë shqiptarët padyshim se ngjallin shpresë se po vijnë ditë të mira edhe për ta, pasi dihet se këta banorë nga paslufta përveç janë diskriminuar në vazhdimësi krahasuar me banorët shqiptarë të komunave tjera.
Këto dy vizita të Limajt dhe premtimet e bëra tashmë në emër të qeverisë duhet që sa më parë të prodhojnë rezultat, pra duhet urgjentisht të plotësohet të gjitha kërkesat e banorëve në mënyrë që të ndihen të mbrojtur nga shteti.
Plotësimi i kërkesave do të thotë qëndrim i banorëve në tokat e tyre, në të kundërtën braktisje e shtëpive. Ndaj në një nga mbledhjet e ardhshme të qeverisë duhet urgjentisht të debatohet për kërkesat e banorëve të këtyre fshatrave dhe sa më parë të nisin punët qoftë për asfaltimin e rrugëve, të sigurohet trasporti publik dhe të plotësohen kërkesat e tjera që t’iu sigurohet një mirëqenie më e mirë.
Jo vetëm për këto fshatra por shteti duhet të marrë veprime edhe për rindërtimin e të gjitha shtëpive në veri të Mitorvicës dhe të garantojë dhe sigurojë rikthimin e të gjithë shqiptarëve në shtëpitë e tyre të cilët u dëbuan nga serbët nga paslufta. /tesheshi.com/
