Zv.kryeministri Fatmir Limaj, i cili mori përsipër gjetjen e një zgjidhje për Demarkacionin ku vizitoi javë më parë edhe shtetin malazez, ka thënë se arritja e kësaj marrëveshjeje zhbllokon rrugën e Kosovës drejt BE-së.
Ai fton Kryesinë e Kuvendit që urgjentisht të thërret seancë me pike të rendit të ditës ratifikimin e Demarkacionit, siç thotë të jetë kjo një dhuratë për qytetarët në prag të 10-vjetorit të pavarësisë.
Deklarata e plotë e Limajt:
Pas një përpjekje dhe angazhimi serioz disa mujor në kërkim të gjetjes se një zgjidhje për marrëveshjen e demarkacionit, e cila do të zhbllokonte rrugën e Kosovës drejt integrimeve evropiane, më në fund kemi marrëveshje mes dy shteteve tona.
Tanimë deputetët e Kuvendit të Kosovës, e kanë rastin që pa asnjë dilemë të votojnë marrëveshjen e cila respekton interesat e dy vendeve.
Shfrytëzoj rastin të falënderoj Malin e Zi për gatishmërshinë e treguar për të gjetur një zgjidhje e cila nuk lenë asnjë dilemë dhe hije në marrëdhëniet mes dy shteteve tona.
Arritja e kësaj marrëveshje do të thellojë marrëdhëniet dhe bashkëpunimin e shumanshëm me shtetin fqinjë, Malin e Zi.
Ftoj, të gjitha Grupet Parlamentare dhe Kryesinë e Kuvendit që urgjentisht të thërrasin seancën për të ratifikuar marrëveshjen për demarkacion.
Ky veprim i Kuvendit të Kosovës do të ishte dhurata më e mirë që mund t’ia ofrojmë qytetarëve të Kosovës në 10 vjetorin e pavarësisë.
Ratifikimi i kësaj marrëveshje përfundimisht i hap rrugë të liberalizimi të vizave dhe konfirmon rrugën e Kosovës drejt integrimeve evropiane. /tesheshi.com/
