Nga zjarret tepër të forta në ishullin Hawaii Maui, sipas të dhënave të fundit të publikuara, kanë humbur jetën 36 persona.
Zjarret e ndezura nga erërat e uraganit Dora që kalon në jug të Hawaii-t kanë djegur kryesisht ishullin.
Skenat janë të tmerrshme, makina të djegura, rrënoja në tym dhe ndoshta një numër dukshëm më i lartë i të vdekurve se ai i raportuar dje.
Po ashtu u shkatërruan 270 ndërtesa.
Maui është një vend historik, i njohur gjithashtu si një destinacion popullor turistik. Familje të tëra u hodhën në oqean për t’i shpëtuar forcës së zjarrit. Richard Olsten, një pilot helikopteri për një kompani turistike, fluturoi mbi zjarrin dhe u trondit nga pamja, e cila “dukej sikur një bombë kishte shpërthyer”.
“Është e tmerrshme. Unë kam fluturuar këtu për 52 vjet dhe nuk kam parë kurrë diçka të tillë. Ne po qanim, dhe pilotët e tjerë në bord dhe mekanikët dhe unë. Nuk e kishim menduar kurrë se do të kishim përjetuar diçka të tillë”, tha ai, duke kujtuar se edhe anijet në port janë djegur.
271 ndërtesa u shkatërruan ose u dëmtuan dhe dhjetëra njerëz u plagosën përveç të vdekurve. Lagje të tëra të qytetit historik dhe destinacionit të njohur turistik të Lahainas u shkatërruan plotësisht.
Presidenti amerikan Joe Biden ka premtuar të gjithë ndihmën për të ndihmuar në luftimin e zjarreve. Në shpëtim janë përfshirë edhe marinsat, helikopterët e të cilëve Black Hawk po ndihmojnë për të luftuar zjarret. Helikopterët Chinook të Gardës Kombëtare të Hawaii-t janë gjithashtu të përfshirë në luftimin e zjarreve. /tesheshi.com/
