Ka marrë një karakter krejt politik një paragjyq ndaj ish-ministrit të Rendit e deputetit socialist, Saimir Tahiri, teksa një treshe prokurorësh të Krimeve të Rënda kërkojnë prej dy ditësh heqjen e mandatit, me gjasë për ta arrestuar, nën pretendimin se ai është përfshirë në trafik droge. Për këtë arsye, Tahiri, teksa e ka quajtur estradë atë që po ndodh në Komisionin e Mandateve, ka deklaruar:
“Unë pranoj çdolloj hetimi, por nuk do të pranoj kurrë një gjyq politik”.
“Kjo që ndodhi sot dhe që ka ndodhur dje, nuk ka ndodhur as në komunizëm dhe as fashistët nuk e kanë bërë! Të të thonë shko në burg dhe pastaj na provo që nuk ke marrë 5 mln euro në muaj, kjo është estradë. Të sjellin një provë të vetme dhe nëse nuk sjellin dot një provë, le të vijë Saliu dhe nëse nuk vjen Saliu, le të vijë djali i Saliut, që la 26 njerëz të vdekur në Gërdec. Nëse nuk vijnë këta, le të vijë Ilir Meta, le të vijë Monika Kryemadhi, le të vijë Lulzim Basha. Le të përballen njëherë me drejtësinë këta!”, tha Tahiri para gazetarëve.
Nga ana tjetër, gruaja në krye të LSI-së, Monika Kryemadhi, tha se vendi do shkojë drejt zgjedhjeve të parakohshme.
“Shumë shpejt në zgjedhje të parakohshme sepse shqiptarët do të zgjohen dhe janë të bindur që nuk mund të përfqësohen në Parlament nga 74 karrige që i kanë blerë me paratë e drogës e krimit, e atyre djemve që kanë humbur jetën në trafiqe kaq të rrezikshme për të mbytur varfërinë ekonomike që ka pllakosur”, tha Kryemadhi në një aktivitet partiak. /tesheshi.com/
