Nga Blendi Gashi
Riformatimi i kabinetit qeveritar ditëve të fundit është ndër temat më aktuale përveç krizës politike dhe zgjedhjes së Thaçit president i Kosovës.
Vet kryeministri, Isa Mustafa, të martën ka bërë të ditur se riformatimi do të ndodhë në ditët në vijim, por nuk ka treguar datë se kur mund të ndodh një gjë e tillë dhe cilëve ministra do t’u ndërrohen dikasteret apo nëse ndonjë prej tyre do të largohet në tërësi.
Por shtrohet pyetja çfarë përfiton vendi nga lëvizja e ministrave nga një dikaster qeveritar në një tjetër?
Praktika ka treguar se riformatimet e tilla ndodhin sa për sy e faqe dhe asgjë të re apo të freskët nuk sjellin në qeverisje.
Më të drejtë mund të konkludohet se këto arnime që bëhen në ekzekutiv nuk i mbajnë gjallë institucionet, por vetëm sa i dëmtojnë ato dhe rrugëtimin e shtetit të Kosovës drejt proceseve zhvillimore dhe integruese.
Padyshim se arnimet e tilla nuk e justifikojnë paaftësinë dhe mospunën e ekzekutivit, por as të ministrave përkatës të cilët duhet të largohen nga pozitat që mbajnë nëse vlerësohet se nuk e kanë kryer punën në mënyrë adekuate, e jo të barten nga një ministri në tjetrën.
Analistët: Riformatimi i ekzekutivit, fasadë kozmetike e dështuar
Njohësit e rrethanave politike ndryshimet eventuale në ekzekutivin kosovar i shohin vetëm si ndërrim xhaketash, por jo freski në udhëheqje.
Analisti politik, Faik Krasniqi, thotë se riformatimi i Qeverisë me njerëz të dështuar dhe të korruptuar, nuk do të rris cilësinë e qeverisjes, nuk do ketë as zhvillim ekonomik, por as qeverisje më funksionale dhe e aftë që do ta luftonte krimin e organizuar dhe korrupsionin.
“Aktorët kryesorë të këtij pushteti, janë njerëzit e njëjtë që po na qeverisin tash e 17 vite dhe fajtorët kryesorë për gjendjen e mjerueshme. Këta janë kupola e mafias dhe ‘Alfa e Omega’ e krimit ekonomik dhe politik në Kosovë.
Çdo tentativë për riformatim të kësaj Qeverie, do të jetë vetëm fasadë kozmetike dhe e dështuar. Prandaj, vetëm krijimi i një klasë e re politike, me njerëz të rinjë, profesionalë dhe të panjollosur, të cilët nuk janë dhe nuk kanë qenë në rrjetin e mafio-politikës, do të mundnin ta nxjerrnin këtë vend nga ky mjerim që e ka kapluar Kosovën. Përndryshe, do të kemi vetëm ndërrim xhaketash e asgjë më shumë, por gjendja nuk do të ndryshojë”, ka thënë Krasniqi, për tesheshi.com.
Njohësi i rrethanave politike në vend, Nexhmedin Spahiu, thotë se problemi nuk janë ministrat aktual në kabinetin qeveritar, por është pikërisht kreu i ekzekutivit, Isa Mustafa.
“Qeveria e Kosovës nuk ka problem me ministrat po me kryeministrin. Është kryeministri ai që duhet të ndërrohet”, ka thënë Spahiu, në një prononcim dhënë për tesheshi.com.
Monitoruesi i Kuvendit nga Instituti Demokratik i Kosovës (KDI), Albert Krasniqi, thotë se koha ka treguar se riformatimet që i bën Qeveria kanë treguar se ato janë shfrytëzuar për të krijuar përshtypjen se me ndryshimin e figurave do të filloj të përmirësohet edhe gjendja në këto dikastere të Qeverisë.
“Nëse një ministër largohet nga pozita, duhet të dihen edhe arsyet që qëndrojnë prapa këtij largimi, për shkak se një ministër me performancës të dobët nuk duhet të kenë mundësi të gradimit në pozita tjera shtetërore”, thotë Krasniqi, për tesheshi.com.
Ministrat që mund të lëvizin nga një dikaster në tjetrin
Në mediat kosovare po qarkullojnë informata të ndryshme se cili ministër mund të lëviz nga njëra ministri në tjetrën apo kush do e zë vendin e Hashim Thaçit në pozitën e zv.kryeministrit por edhe të ministrit të Jashtëm.
Ministri i Drejtësisë, Hajredin Kuçi, raportohet se do të emërohet zv.kryeministër i parë, pasi thuhet se ka kërkuar që të lirohet nga detyra e ministrit.
Pozitën e ministrit të Drejtësisë flitet se do ta zë Haki Demolli, aktualisht ministër i Forcës së Sigurisë së Kosovës.
Kurse drejtimin e FSK-së pritet ta rimarrë sërish Agim Çeku i PDK-së.
Dilema më e madhe është se kush do ta udhëheq ministrinë e Punëve të Brendshme. Medait kosovare së fundmi kanë shkruar se këtë ministri do ta udhëheq Gani Koçi i PDK-së, zv.ministër aktual i Zhvillimit Ekonomik.
Ndërkaq, Enver Hoxhajt, përflitet se do që emërohet ministër i Jashtëm.
Deputeti i LDK-së, Sali Morina raportohet se do të emërohet ministër i Kulturës në vend të Kujtim Shalës i cili do të mbaj veç pozitën e zv.kryeministrit.
Ndryshe, nuk përjashtohet mundësia të ndodhin edhe ndryshime të tjera brenda kabinetit qeveritar. /tesheshi.com/
