Nga Blendi Gashi
Dy ish-shefat e Agjencisë Kosovare të Intelegjencës pas një kohe mosangazhimi i janë rikthyer punës.
Njëri ka zgjedhur që karrierën ta vazhdojë në institucione e tjetri të merret me profesionin e tij.
Bashkim Smakaj (shefi i parë i AKI-së), i cili qëndroi për dy vite i papunë është emëruar si këshilltar i presidentit Thaçi, pra ka vendosur që t’i bashkangjitet ekipit të njeriut i cili në vitin 2009 e emëroi drejtor të Intelegjencës.
Smakaj, sipas burimeve tesheshi. com ka pasur disa oferta për punë gjatë dy viteve të kaluara sidomos nga disa universitete private, si dhe organizata qeveritare, por që ka vendosur që të vazhdojë punën në institucione dhe të ketë sërish për shef Thaçin.
Smakaj, daljen e parë publike si këshilltar i Thaçit e ka bërë në një konferencë që u mbajt këtë javë për Forcën e Sigurisë së Kosovës,
Kujtojmë se dorëheqja e Smakajt la shumë mjegull pas dhe asnjëherë nuk u bën të ditura arsyet pse u dorëhoq nëse vërtet ndodhi një gjë e tillë, apo pse u shkarkua.
Selimaj nis punën si avokat
Për dallim nga Smakaj, pasuesi i tij Agron Selimaj (shefi i dytë i AKI-së), disa muaj pas dorëheqjes enigmatike nga kjo pozitë, është kthyer në profesionin e tij të mëparshëm.
Ai nga fillimi i kësaj jave i është kthyer punës së avokatit, profesion të cilin e ushtroi për 3 vjet para se të fillonte punën në Agjencinë e Inteligjencës, ndonëse raportohet se ka pasur jo pak oferta pune në institucione të ndryshme.
Se i është kthyer punës së avokatit, e ka konfirmuar edhe vetë Selimaj për mediat ksoovare.
Ish-shefi i Inteligjencës ka treguar se i është kthyer punës së avokatit ku do të punojë në çështje të fushës civile.
Ai ka hapur zyrën e avokatisë në rrugën Garibaldi në Prishtinë, përballë hotelit Grand.
Edhe dorëheqja e Selmajt ndodhi papritur. Ndonëse ai përmes një letre dorëheqjen e lidhi me arsye familjare, mediat raportuan se ai në fakt u shkarkua nga Thaçi pasi një auditor zbuloi keqpërodirme të mëdha në AKI. Dhe largimi i Selimajt, sipas opozitës ndodhi për të mbuluar keqpërdorimet.
Javë më parë njohës të çështjeve të sigurisë kanë deklaruar për tesheshi. com se çështja e shefave të AKI-së pas largimit të tyre nga detyra duhet urgjentisht të rregullohet me ligj në mënyrë që ish-kryespiunët të ngelen brenda institucioneve.
Sipas tyre është në interes të shtetit që zyrtarë të tillë të mos i lënë pa mbrojtje institucionale, me qëllim që të evitohen mundësitë kur këta persona informatat që i kanë siguruar gjatë ushtrimit të funksioneve të tyre të mos i ndajnë apo keqpërdorin me persona të paautorizuar, ku dëmi për shtetin do të ishte shumë i madh. /tesheshi.com/
