Kreu i AKEP-it Ilir Zela, ka reaguar ndaj deklaratës së kreut demokrat Basha, i cili e quajti këtë instancë si “Polici Mendimi” të Ramës.
Pretendimit të Bashës se afati që iu është vënë disa portaleve për t’u regjistruar në QKR e publikuar NIPT-in, drejtuesi i AKEP-it i përgjigjet:
“AKEP-i nuk synon të mbyllë asnjë media online sepse po ta kishte këtë synim, do të mjaftonte zbatimi i ligjit ekzistues, miratuar me votën tuaj, për të mbyllur një pjesë të madhe të tyre”, thuhet në deklaratë.
“Për ta lehtësuar këtë shpjegim, unë ju ftoj ju dhe këdo që dëshiron, të klikojë një çfarëdo media online në vendin fqinj, Itali. Aty do të gjeni NIPT-in identifikues, që nuk është një damkë censure, por një kartë identiteti e veprimtarisë ekonomike. Dhe po zoti Basha, çdo media online (përjashto blogjet individuale) është një entitet tregtar dhe jo një frëngji nga ku persona të paidentifikuar qëllojnë, pa treguar as burimet e financimit e madje duke ofruar edhe hapësira për reklama tregtare apo shitje të natyrave të tjera”, thuhet më tej në deklaratën e AKEP-it.
Kujtojmë se drejtuesi i këtij institucioni, Ilir Zela, ka qenë një ndër figurat kryesore të PS-së në kohën e Nanos. /tesheshi.com/
