Bankës Qendrore Europiane do t’i duhet të marrë një vendim nëse do të vijojnë më të shtypen kartmonedha 500 euroshe.
Anëtari i bordit ekzekutiv, Benoit Coeure, i ka deklaruar së përditshmes franceze Le Parisien se çështja po diskutohet dhe shpejt do të merret një vendim, ndërsa argumentet për të vijuar shtypjen e kartmonedhës 500 euroshe bëhen gjithnjë e më pak bindëse.
Sipas tij, autoritetet po dyshojnë përherë e më shumë se këto kartmonedha po përdoren për veprimtari të jashtëligjshme. Eshtë një argument që nuk mund të shpërfillet, duke patur parasysh luftën kundër pastrimit të parave dhe të financimit të terrorizmit, ka nënvizuar Coeure.
Komisioni i BE-së lajmëroi më herët gjatë shkurtit se do të kishte konsultime me Bankën Qendrore Europiane dhe me palë të tjera në lidhje me mundësinë e marrjes së një vendimi për kartmonedhat 500 euroshe.
Statistikat e Bankës Qendrore Europiane tregojnë se 500 euroshet përbëjnë vetëm tre për qind të kartmonedhave në qarkullim, por 28 për qind të shumës së përgjithshme.
Vendimi për tërheqjen e mundshme të kartmonedhave 500 euroshe do të merret nga këshilli drejtues i Bankës Qendrore Europiane. /tesheshi.com/
