Nga Artlind Reçi
Tashmë, partia shqiptare BDI, pjesë e koalicionit qeverisës krah Gruevskit, nuk kontestohet vetëm politikisht, që kur është bërë me dije senjë aferë e madhe korruptive në të cilën krerët e saj janë përfshirë, është trajtuar nga Gjykata e New Yorkut.
Ish-shefi i policisë sekrete të Maqedonisë dhe ish-këshilltari i qeverisë, Sllobodan Bogoevski, në mënyrë të hollësishme i përshkruan të gjitha operacionet dhe aktivitetet në të cilat ka marrë pjesë edhe ndërmjetësuesi i tyre, i angazhuar nga biznesmeni kontrovers grek, Dimitris Kondominas. Para gjykatës së Neë Yorkut, Bogoevski ka folur për rryshfetin qe kanë marrë partnerët shqiptarë të qeverisë së vitit 2005-2006 të drejtuar nga ish-kryeministri Vllado Buçkovski, me qëllim të korruptimit të tyre. Kështu, në transkriptin e publikuar në 166 faqe, Bogoevski i përmend Buçkovskin dhe personat A.A. dhe M.Xh. se në shumë raste, më ndërmjetësim të njerëzve të Kondominas, kanë marrë rryfshet në vlerë prej 7.5 milionë euro (në kesh).
Sipas analistëve të mirënformuar, kjo është ndër aferat më të mëdha deri më tani, aq më tepër që burimin kjo aferë e ka në SHBA.
Xhella Neziri thotë se një goditje aq e ashpër ndaj krerëve të një partie nuk është mbajtur mend. Ai për portalin tesheshi.com thotë se kemi të bëjmë me dy akuza mjaft të rënda dhe serioze që i adresohen Ali Ahmetit si lider i BDI-së dhe Musa Xhaferit, si zv/kryeministër, njëra për rryshfet 5 milionë eurosh e tjetra për tentim vrasjeje.
“Miqësia e BDI-së me faktorin ndërkombëtar është zbehur dhe do të vazhdojë prishet për sa kohë që aferat korruptive të ndërlidhura me krerët e kësaj partie do të dalin në publik. Njëlloj siç është prishur miqësia me kryeministrin Nikolla Gruevski dhe krerët e partisë së tij, ashtu do të ndodhë edhe me Ahmetin dhe bashkëpunëtorët e tij. Kjo aferë që nuk ka asnjë epilog në Maqedoni, në fakt është pengesë për integrimin e vendit në BE dhe NATO. Andaj do të jenë të pakuptimta“, thotë Neziri, i cili shton se: “Frazat për integrime euro-atlantike apo rrahja gjoks për gjoja miqësinë me faktorin ndërkombëtar, ka filluar të zbehet; Bashkimi Demokratik për Integrim do ketë rënie të madhe në zgjedhjet e ardhshme”.
Sipas Nezirit, e gjithë kjo aferë do të ketë impakt edhe në skenën politike të Maqedonisë, me ç’rast do të shkaktojë dobësim të BDI-së. “Mbase jo aq sa pritet, por BDI do të ketë rënie në zgjedhjet e ardhshme të 24 prillit”, shton ai.
Edhe analisti tjetër, Ibrahim Mehmeti, thotë se kjo aferë është një goditje e madhe për BDI-në.
“Afera e fundit gjithsesi mund të ketë ndikim në skenën e brendshme politike, mirëpo sa i përket integrimeve euro-atlantike punët qëndrojne ndryshe. Edhe pse BDI pretendonte se ajo mund të luajë rol të rëndësishëm në këtë proces, është më se e qartë se roli i kësaj partie ka qenë më shumë ceremonial, se sa që ka pasë ndikim esencial në proces”, shtjellon Mehmeti. /tesheshi.com/
