Qeveria ka marrë përsipër shpenzimet e sjelljes në atdhe e më pas varrimit të të riut nga Shkodra Florenc Beqiraj, i cili humbi jetën në një spital në Francë, pasi siç thuhet deri më tani në rrugë jo-zyrtare, është dhunuar në një burg të Marsejës, pasi ndodhej aty për mungesë dokumentash leje-qëndrimi. Ministri i Jashtëm Ditmir Bushati, i cili është njëherësh dhe deputet i Shkodrës, vizitoi familjen e të ndjerit dhe premtoi zbardhjen e së vërtetës për atë që ka ndodhur.
“Jemi në kontakt të pandërprerë me autoritetet franceze, ministrinë e Brendshme dhe të Jashtme. Të presim përfundimin e hetimeve, të respektojmë vdekjen. Qeveria merr përsipër shpenzimet për transportin e trupit të viktimës dhe sjelljen në atdhe. Prioritare për ne që hetimet të shkojnë deri në fund dhe të zbardhen rrethanat”, ka thënë Bushati.
Dy ditë më parë, aty qe dhe një ekip këshilltarësh të Presidentit Meta, gjë është parë dhe si politizim i çështjes. Tek kësaj tabloje, mbetet çeshtje e pazgjidhur fakti se çka ndodhur me të ndjerin që përfundoi gjysëm i vdekur në spital. Deri me tani, autoritetet franceze nuk kanë dhënë njoftim për ndonjë të proceduar lidhur me rastin, qoftë dhe në ambientet e burgut ku i riu shkodran ndodhej. /tesheshi.com/
