Nga Blendi Gashi
Lista Serbe e cila ka bojkotuar institucionet prej disa muajsh për momentin mbetet faktori kyç në zhbllokimin e shumë vendimeve të mëdha.
Kjo listë përveç që bllokon prej kohësh themelimin e ushtrisë, mbetet faktor kyç edhe për ratifikimin e marrëveshjes për Demarkacionin me Malin e Zi, pa votat e së cilës nuk mund të miratohet, duke parë kundërshtinë e tri partive opozitare.
Kryeministri Mustafa ditë më parë bëri me dije se ka kërkuar prej tyre disa herë të kthehen në institucione por që nuk ka marrë asnjë përgjigje.
Duke parë këtë refuzim, aktualisht kjo listë po del të jetë më e fortë se dy partitë në pushtet, PDK e LDK, të cilat po vërtetohet se asnjë vendim të madh nuk po arrijnë ta marrin pa serbët.
Këta të fundit raportohet se për t’u rikthyer në Kuvend dhe votuar Demarkacionin kusht kryesor kanë themelimin e “Zajednicës”, marrëveshje të cilën e kundërshton fuqishëm opozita.
Drejtues të “Srpska”-s thonë se aspak nuk u intereson Demarkacioni duke thënë se fati i kësaj marrëveshje nuk varet nga votat e tyre por nga partitë shqiptare.
“Ajo që është e sigurt është fakti se nëse ka një konsensus të shqiptarëve në Kuvend, nuk do të ketë nevojë për votimin e serbëve për ratifikimin e Marrëveshjes së Kufirit ndërmjet Kosovës dhe Malit të Zi. Për ne tema kryesore do të jetë formimi i Bashkësisë së Komunave Serbe, sidomos për faktin se përmes saj dëshirojmë të nisemi në drejtim të marrjes së vendimeve të rëndësishme për bashkësinë serbe, por edhe përgjithësisht për shoqërinë në Kosovë”, ka thënë për “Zërin” Slavko Simiq.
Ndërsa zyrtarë qeveritarë e pranojnë se pa votat e serbëve Demarkacioni nuk mund të kalojë, pasi ka kundërshti edhe nga deputet brenda koalicionit.
“Na vyen votat e listës serbe për ta kaluar Demarkacionin, pasi që kemi një opozitë kryeneçe që ka lidhur krye se nuk do e votoj Demarkacionin. Unë për vete mendoj se Demarkacionin do e qojmë në Kuvend në momentin që mendojmë se i kemi votat. Tash për tash nuk janë votat, sepse nuk është lista serbe dhe ajo ka qenë e qartë se nuk do kthehen. Pra, pa njërën ose tjetrën nuk mund të kthehet”, ka thënë për mediat Bajram Gecaj, këshilltar i Mustafës.
Opozitarët dhe analistët politik shprehen se votat e partive të minoritetve do duhej të ishin vetëm mbështetje e një konsensusi të partive shqiptare, por jo vota kushtëzuese.
Bilall Sherifi, nga NISMA për Kosovën thotë se çështjet e mëdha strategjike duhet të zgjidhen nga përfaqësuesit e shumicës shqiptare dhe se votat e partive të pakicave do duhej të ishin vetëm në mbështjetje të konsensusit.
“Në interes të marrëdhënive të mira mes shumicës shqiptare dhe pakicave tjera është që vota e tyre gjithnjë të jetë vetëm në funksion të mbështetjes së konsensusit të partive shqiptare por në asnjë mënyrë si zëvendësim për konsensusin mes shqiptarëve”, thotë Sherifi, për tesheshi. com.
Islam Krasniqi, njohës i rrethanave politike thotë se Lista Serbe do vëj kusht themelimin e “Zajednicës”, për rikthimin në institucione dhe më pas votimin e Demarkacionit.
“Minoriteti serb për nga fuqia që i është dhënë me Kushtetutë del të jetë më e fuqishme se çdo parti tjeter, sepse e drejta e vetos e fuqizon atë në çdo aspekt si parti politike. Dëshmia më e madhe për këtë është edhe shndërrimi i FSK-së në FAK. Lutjet e kryeministrit e tregojn më së miri se fati i vendimëee kryesore është i varur nga minoriteti serb, ku klasa politike ka pranuar pakon e Ahtisarit, e cila e diskriminon shumicën dhe çdo minoritet tjetër duke i favorizuar serbët, dhe tash për çdo veprim duhet të bëhen kompromise me Listën Serbe”, thotë Krasniqi, për tesheshi. com. /tesheshi.com/
