Ismail Morina, apo “ballisti” i famshëm i dronit duket se është në të njëjtat pozita me Ramush Haradinajn, i cili gjithashtu u kërkua të ekstradohej në Serbi disa muaj më parë.
Siç bën të ditur gazeta kroatë Veçernie List, më shumë sesa gjykata e shkallës së dytë që duhet të marrë vendim të formës së prerë, është i rëndësishëm vendimi që do të marrë ministri i drejtësisë kroate.
Pas vendimit të shkallës së parë të Gjykatës së Dubrovnikut për ekstradimin e Ismail Morinës në Beograd, mediat serbe thellohen më tej në këtë çështje në lidhje me hapat e mëtejshëm që do të ndërmerren nga autoritetet gjyqësore kroate.
Në një intervistë për Vecernje Novosti, gjykatësi që mori vendimin në dëm të tifozit shqiptar, Pero Miloglav lë të kuptohet se ky vendim ka shumë mundësi të hidhet poshtë në instancat e tjera më të larta.
Ai fillimisht thekson se e mori vendimin në bazë të dokumentave që kishte në tryezën e tij, por shton se tashmë çështja kalon në Gjykatën e Lartë të Zagrebit që do të japë edhe vendimin përfundimtar. Ai shton se mundësitë që Gjykata e Lartë ta zhvlerësojë ekstradimin janë të mëdha.
Gjithsesi, edhe në rast se ky organ konfirmon dënimin, shpresat për Ismail Morinën nuk do të shuhen sepse është ministri kroat i Drejtësisë, Drago Boshnjak, ai që do të thotë fjalën e fundit nëse Morina duhet të ekstradohet ose jo në Serbi. Urdhërin e transferimit të Morinës në Beograd e ka kërkuar Ministria Serbe e Drejtësisë menjëherë pasi ai u ndalua nga autoritetet kroate.
Aktualisht, Gjykata e Lartë Serbe ka nisur një proces ndaj tij për çështjen e ngritjes së dronit në ndeshjen eliminatore Serbi-Shqipëri të tre viteve më parë, dhe sipas mediave ai rrezikon deri në tre vjet heqje lirie.
Gjithsesi, lobimi dhe ndërtimi i kanaleve diplomatike mes Tiranës dhe Zagrebit i ngritur për këtë çështje mund ta lehtësojë pozitën e Morinës pasi vendimi përfundimtar, ashtu siç e bën me dije edhe gjyqtari i shkallës së parë të Dubrovnikut, i takon pikërisht një anëtari të ekzekutivit kroat, ministrit të Drejtësisë, Drago Boshnjak. /tesheshi.com/
