Tiranës do t’i shtohet edhe një tjetër mjedis çlodhës dhe argëtues për banorët. Sot nisi proçesi i pyllëzimit në Parkun e Liqenit të Farkës, për ta shndërruar atë në mushkërinë e dytë të kryeqytetit.
“Parku i Farkës do të jetë parku i dytë i Tiranës, i ngjashëm me atë të Liqenit, meqenëse ky i fundit nuk mjafton për një qytet me një milion banorë”, deklaroi Veliaj, gjatë mbjelljes së fidanëve të rinj në Parkun e Liqenit Artificial.
Kryebashkiaku u bëri thirrje sipërmarrjeve që t’i bashkohen nismës për të kontribuar në shtimin e hapësirave të gjelbërta të qytetit. “Këtë muaj do të kalojmë Planin Urbanistik të Tiranës në Këshillin Bashkiak. Plani parashikon mbjelljen e 2 milion pemëve, që përbëjnë kurorën e gjelbër të Tiranës, ose ndryshe Pyllin Orbital. Nuk besoj se ka dhuratë më të bukur se ajo që i jepni qytetit, pra gjelbërim dhe oksigjen”, tha Veliaj.
I shoqëruar edhe nga drejtori i APR-së, Blendi Gonxhe, kryebashkiaku deklaroi se po vijon puna për ndërtimin e pesë parqeve të tjera, të cilat do t’i ofrojnë qytetarëve më shumë mundësi çlodhjeje./tesheshi.com/
