Në një prej fotove që shoqërojnë tragjedinë e fundit të refugjatëve në ishullin Lesbos, shfaqet dhe një person që ka veshur fanelën e kombëtares shqiptare. Dhe pyetja e parë që të vjen ndërmend është se a është vallë ai një shtetas shqiptar i ndodhur rastësisht në vendin e tragjedisë?
Për të thënë se “po, mund të jetë”, na mjafton të bëjmë një deduksion me faktin se në Greqi gjenden aq shumë shqiptarë si emigrantë, sa nuk është hiç çudi që në çfarëdolloj situate prezenca e tyre të jetë diçka normale; plus fakti se rezultatet e kombëtares, e kanë bërë më të dashur fanelën kuqezi, për të qenë ajo gjithnjë e më prezente në trupa shqiptarësh, aq më shumë kur janë të përmalluar për atdhe.
Por në skena kaq tragjike si kjo, do ishte cinike që t`i jepnim më tepër rëndësi këtij detaji nacional, më tepër sesa asaj çfarë ka ndodhur, ku dhjetra njerëz, mes tyre dhe shumë fëmijë, janë mbytur në det.
E rëndësishme është që në u ndodhshin shqiptarë në këtë plojë refugjatësh, të lënë emër të mirë si njerëz zemërgjerë dhe humanë. /tesheshi.com/
