Të afërmit e viktimave të koronavirusit nga Bergamo, qyteti simbol në pjesën veriore të Italisë i prekur nga epidemia, kanë ndërmarrë hapa ligjorë në kërkim të drejtësisë për të vdekurit e tyre.
Ky është aksioni i parë i këtij lloji në Itali, ku pandemia mori gati 34,000 jetë.
Anëtarët e shoqatës “Noi Denunceremo” (Ne do të padisim), e cila buroi nga një grup në Facebook, depozituan 50 ankesa individuale në prokurorinë e Bergamos.
“Ne jemi të gjithë nga zona e Bergamos dhe të gjithë kemi histori të ngjashme, histori të tragjedive familjare, dhe të gjithë jemi duke kërkuar përgjigje të qarta dhe serioze nga prokurorët”, tha farmacistja Cristina Longhini, babai 65-vjeçar i së cilës vdiq në mars nga koronavirusi në një spital në Bergamo. .
Kur u sëmur, thotë ajo, mjeku i familjes nuk pranoi ta vizitonte atë në shtëpi dhe nuk kishte një ambulancë në dispozicion për ta çuar në spital.
Kur më në fund u shtrua në spital, ai nuk u shpëtua më.
“Kur vdiq, ata harruan dhe të na telefononin”, thotë Longhini.
Meqenëse nuk kishte vend që babai i saj të varrosej në një nga varrezat lokale, arkivoli me trupin e tij, së bashku me dhjetëra të tjerë, u transportua me kamion ushtarak në një vend të panjohur.
Familja përfundimisht zbuloi se babai ishte varrosur 200 kilometra larg, kur fatura për shpenzimet e varrimit arriti me postë.
“Do t’u takojë autoriteteve gjyqësore të marrin në konsideratë paditë,” i tha avokati Consuelo Locati agjencisë së lajmeve ANSA.
“Nuk do të jetë një hetim i shpejtë, sepse është një çështje e ndjeshme.”
Procedurat gjyqësore tregojnë atë që përjetuan të gjitha familjet – nga mungesa e informacionit deri te kujdesi i pamjaftueshëm.
Paditë janë ngritur kundër personave të panjohur dhe 150 raporte të tjera raportohet se janë duke u përgatitur. /tesheshi.com/
