Familjarët e një nga dramave më të mëdha të shqiptarëve të Maqedonisë, të dënuarve për rastin “Monstra” kanë bërë apel në mes të fushatës zgjedhore për krerët e rinj të njësive vendore që të mos përdoret tragjedia e tyre për politikë.
“Meqë jemi në fushatë zgjedhore, do isha lutur që rasti ynëtë mos keqpërdoret për përfitime politike, pasi kostoja është shumë e madhe.
Të jemi të qetë. Fushata ka mënyra të tjera se si bëhet. i dinë ato i kanë programet e tyre, por jo edhe në këtë mënyrë. Si familjar dhe si kryetar i këshillit organizativpër rastin ‘Monstra’ do të apeloj që të mos keqpërdoret. Faleminderit prej të gjithëve që kanë kontribuar”, deklaroi Bedri Ajdari, një nga familjarët e të dënuarve.
Ndërkaq, duke iu referuar procesit që po zhvillohet, Ajdari akuzoi prokurorinë se po merret më shumë me supozime sesa me prova.
“Çështja është vetëm që rasti të merr epilog të drejtë për të cilin po luftojmë për pesë vite.Ne kemi shpresë për një zgjidhje të drejtë dhe të përfundojë në mënyrë ligjore, siç e meriton” , tha më tej Ajdari.
Prokurorja Liljana Spasovska në seancën e djeshme të rastit “Monstra”, e paralajmëroi kryetarin e Gjykatës Supreme, Jovo Vangellovski që nëse ai nuk e pranon kërkesën për rigjykim të çështjes nga e para, ajo do të përdorë argumente kundër vendimit për dënim me burg të përjetshëm, pa u shoshitur të gjithë faktet.
Ky është një hap i parë juridik i gjithë rishqyrtimit të çështjes që mund të kthejë sërish nga e para historinë e vrasjes së pesë personave, krim për të cilin janë dënuar disa shqiptarë pa asnjë provë apo dëshmi relevante. /tesheshi.com/
