“Një urdhër ekzekutiv që ndalon hyrjen e refugjatëve sirianë në SHBA do të shpartallojë dhe të ndajë familje të tëra”, kanë thënë anetarët e një familjeje siriane për Al Jazeera.
Kjo familje që ka gjetur strehim në Kaliforni, i bëri thirrje Trumpit që të rishqyrtojë ndalimin duke thënë se kjo ishte një pengesë e pakapërcyeshme për shumë bashkëatdhëtarë të tyre që po kërkojnë siguri.
Bill Dalati tha për Al Jazeera-n: “Miqtë dhe kushërinjtë e mi janë ende atje. Ata po vdesin. Pa ushqim, pa ilaçe, shtëpitë e tyre janë bombarduar, strehimoret e tyre janë bombarduar dhe ata nuk kanë ku të shkojnë. Ku mund të shkojnë ata?”
Gruaja e tij, Dalal Alia, tha se komentet e Trumpit kishin bërë që ajo të ndihet më e pafuqishme se kurrë.
“Më duhet t’i shpëtoj ata, por ata nuk po më lënë. Çdo ditë zgjohesh dhe ke frikë që kur të lajmërohesh në telefon, dikush do të të thotë: ‘Oh, sapo ke humbur vëllain’, ose ‘ke humbur motrën, ose ‘ke humbur dikë’”.
Urdhëri, i cili ka shkaktuar zemërimin e demokratëve dhe grupeve për të drejtat civile, ndalon shtetasit e Iranit, Irakut, Libisë, Somalisë, Sudanit, Sirisë dhe Jemenit nga hyrja në SHBA.
Pavarësisht se asnjë prej autorëve të ndonjë sulmi në Amerikë nuk vjen nga këto vende, administrata Trump insiston se urdhëri nuk ka për synim muslimanët. Por nga ana tjetër, të premten, gjatë një interviste për Christian Broadcasting Netëork, Trump tha se prioritet i administratës së tij do të jetë ndihma ndaj të përndjekurve të krishterë në Lindjen e Mesme dhe Afrikën e Veriut.
“Ata janë trajtuar në mënyrë të tmerrshme”, tha Trump, duke iu referuar të krishterëve. /tesheshi.com/
