Firma ligjore britanike Stewarts Law po bëhet gati të çojë në gjyq FIA-n, skuadrën Marussia, si dhe grupin e Formulës 1 të Bernie Ecclestone-it, për vdekjen e shmangshme të pilotit francez Jules Bianchi.
Familja e ish-pilotit 25-vjeçar, të ndarë nga jeta në korrik të 2015-ës, mendon se veprimet e tre palëve kanë kontribuar në vdekjen e të dashurit të saj.
Ata pretendojnë se qenë bërë gabime në planifikimin, në kohën, në organizimin e në zhvillimin e garës, të kryer në kushte të rrezikshme gjatë sezonit të tajfuneve në Japoni.
I ati i pilotit do të thoshte për BBC-në, “Nuk ishte një incident normal. Ata thanë se nuk bënë asnjë gabim, por pas [vdekjes së tij] ndryshuan gjithçka.
Ndërsa në një deklaratë, ai shprehet: “Duam drejtësi për Jules-in, e duam të dalë e vërteta për vendimet që çuan në përplasjen e djalit tonë.”
Jules Bianchi përsoi dëmtime të rënda në kokë kur makina e tij u përplas me një vinç të lëvizshëm në Çmimin e Madh të Japonisë, në Suzuka, në tetor të vitit 2014.
Ai do të vdiste nëntë muaj më vonë, më 17 korrik 2015, pasi nuk ia doli t’i përballonte plagët e asaj përplasjeje. /tesheshi.com/
