Familja e ish-aktivistit të Vetëvendosjes, Astrit Deharit, i cili ndërroi jetë në burgun e Prizrenit, do të lejojë edhe zhvarrosjen e trupit të tij. Ekspertiza për rastin e Astritit do të mbahet në Zvicër, e për të qeveria i ka ndarë 50 mijë euro.
Avokati i familjes Dehari, Tomë Gashi tha se me qëllim të gjetjes së të vërtetës do të lejohet çfarëdo lloj ekspertize që kjo qendër konsiderohen se është e nevojshme.
“Prindërit e Astrit Deharit kanë njoftuar se nëse instituti i Mjekësisë Ligjore kërkon eventualisht zhvarrosjen e trupit të pajetë të Deharit, këta në interes të drejtësisë do ta pranojnë edhe këtë, pa marrë parasysh së është e rëndë për familjen”, tha ai për “Express”.
Fillimisht, rasti do të shkojë në Institutin e Mjekësisë Ligjore në Zvicër, të cilën e ka zgjedhur familja e të ndjerit, e pastaj për llojin e hetimeve do të njoftohet prokurori i rastit, Ministria e Drejtësisë, si dhe familja.
Gashi ka deklaruar se Prokuroria Themelore në Prizren ka nxjerrë tashmë vendimin me të cilin autorizohet kjo qendër për hetime të pavarura.
“Më në fund pas 15 muajsh nga kërkesa e familjes Dehari, Prokuroria Themelore në Prizren ka nxjerr vendim me të cilin ka autorizuar Qendrën Universitare të Mjekësisë Ligjore në Lozanë të Zvicrës që të ndërmarr veprime të pavarura hetimore në rastin e Astrit Deharit”, tha Gashi.
Kujtojmë se Astrit Dehari, aktivist i Vetëvendosjes, vdiq në Qendrën e Paraburgimit në Prizren, më 5 nëntor të vitit të 2016-tës, derisa po mbahej në lidhje me sulmin e gushtit 2016 në ndërtesën e Kuvendit të Kosovës. /tesheshi.com/
