Ngushëllimet e bëra nga presidenti Hashim Thaçi, kryeministri Isa Mustafa, kryekuvendari Kadri Veseli dhe pushtetarë të tjerë bërë në drejtim të familjes Dehari për vdekjen e birit të tyre Astritit, janë të papranueshme për familjen.
Një telegram ngushëllimi i dërguar tre ditë pas vdekjen së Astritit nga presidenti Hashim Thaçi, ka bërë që të reagojë Familja Dehari e cila deklaron se nuk do të pranojë letra dhe as telegrame ngushëllimi nga asnjë udhëheqës të institucioneve më të larta të këtij pushteti vrastar, apo vartësve dhe zbatuesve të politikave të këtyre pushtetarëve.
Përmes kësaj deklarate Familja Dehari siç mund të kuptohet bën direkt përgjegjës pushtetin për vrasjen e të birit Astritit, ashtu si edhe Lëvizja Vetëvendosje.
Kjo është deklarata e plotë e familjes Dehari:
“Dje, zyra e të ashtuquajturit President i Kosovës, përmes një postieri personal, ka bërë përpjekje t’i lë në dorë prindërve të Astrit Deharit një letër të mbyllur.
Prindërit e Astritit e kanë refuzuar pranimin e kësaj letre, pa e hapur fare, pasi janë njoftuar nga kush është dërguar kjo letër.
Familja Dehari me këtë rast deklaron se nuk do të pranojë letra dhe as telegrame ngushëllimi nga asnjë udhëheqës të institucioneve më të larta të këtij pushteti vrastar, apo vartësve dhe zbatuesve të politikave të këtyre pushtetarëve.
Familjarët e Astrit Deharit
Xhemile, Avni, Albana dhe Arta Boshtraj-Dehari”. /tesheshi.com/
