“Familja” Berisha kërkon largimin e Lulzim Bashës: emrat dhe deklarata

Në mënyrë të papritur, jashtë çdo rruge normale brenda selisë blu, një grup përfaqësuesish politikë të Partisë Demoratike kanë firmosur një deklaratë ku kërkojnë largimin e Lulzim Bashës nga drejtimi i partisë.

Deklarata është lexuar në një transmetim direkt televiziv, ku është dërguar pa asnjë adresë apo përfaqësi legale brenda PD-së.

Drejtuesi i lajmeve që lexoi deklaratën tha se të gjithë personat janë të zgjedhur në PD, por ajo që ra në sy ishte se asnjëri prej tyre nuk rezulton deputet i Partisë Demokratike apo anëtar i kryesisë, por krerë departamentesh.

Në listën e lexuar nga Bledian Koka në News 24 binin në sy Jamarbër Malltezi, bashkëshorti i Argita Berishës, Avenir Peka, ish-këshilltar i ngushtë i ish-kryeministrit Berisha, Edith Harxhi, këshilltare e afërt e Berishës edhe sot, artisti Julian Deda, që është një mik i afërt i Shkëlzen Berishës, Indira Bushati, ish-kreu i AMA-s dhe ish-këshilltare e Berishës, Juela Meçani, zëdhënëse e Berishës. Nard Olli, kryetar i këshilltarëve bashkiakë të PD-së etj.

Deklarata e Plotë

Tani që përfundoi numërimi i çdo kutie të këtij procesi zgjedhor të vështirë dhe të ndotur nga paratë e pista të drogës dhe kërcënimeve të papranueshme për një shoqëri të lirë, dëshirojmë që në radhë të parë të falenderojmë komisionerët dhe numëruesit e PD që kanë qenë heronj, dinjitozë dhe qëndrestarë në këto momente të vështira për PD dhe procesin zgjedhor.

Humbja e thellë e PD në këto zgjedhje na detyron marrjen përsipër të përgjegjësive. Lulzim Basha kryetari i PD është përgjegjësi kryesor i kësaj humbjeje. Për më tepër Kryetari i Partisë ka marrë përsipër personalisht, në shkelje të normave statutore hartimin e listës së deputetëve dhe programin e fushatës, duke hequr përdhunshëm simbolet e PD dhe mbjellë përçarje të pamerituar me etiketimet “ky është i republikës së vjetër deri tek 22 vjeçaret e FRPD”.

Basha bëri një fushatë për Listën Basha duke mos reflektuar asnjë nga shqetësimet dhe kauzat kryesore të opozitës si kriminalizimi i parlamentit dhe administratës, droga, koncesionet etj dhe në përputhje të plotë me fushatën e PS.

Prandaj, Kryetari i PD Lulzim Basha si përgjegjësi i kësaj humbjeje duhet të japë dorëheqjen për t’i hapur rrugë rinovimit të PD dhe bashkimit sa më të gjerë të saj!

Nënshkruesit e deklaratës: