Nga Musa Mustafa
“Gjeneralët serbë kurrë nuk do ta lëshojnë Kosovën!”
Kështu është shprehur ish-komandanti i xhandarmërisë serbe dhe aktualisht z/drejtor i policisë së Serbisë, gjenerali Bratisllav Dikiq, gjatë një vizite në veriun e Kosovës duke u fotografuar para kishës së Shën Dimitrijes në veri të Mitrovicës.
Dikiq, në llogarinë e tij në FB ka shkruar se: “Gjeneralët serbë kurrë nuk do ta lëshojnë Kosovën, ndërsa ju serbë kurrë nuk do ta lëshoni tokën e shenjtë serbe, Kosovën dhe Metohinë, ’në emër të atit, të birit dhe të shpirtit të shenjtë’”, ka shkruar Dikiq.
Ky reagimi i tij ka ardhur pas nënshkrimit të marrëveshjes për kontrollin e zonës 25 km të hapësirës ajrore të Serbisë përgjatë kufirit me Kosovën, marrëveshje kjo që është nënshkruar mes gjeneralit të ushtrisë së Serbisë, Ljubisha Dikoviq dhe komandantit të KFOR-it, general/major Guglielmo Luigi Miglietta, në Prishtinë.
Ky koment i Dikiqit pason reagimet e ashpra që kanë ardhur nga organizatat vendore dhe ndërkombëtare për të Drejta e Njeriu të cilat e akuzojnë gjeneralin Ljubisha Dikoviq se ka kryer krime lufte në Kosovë ndaj popullatës civile shqiptare.
Bratisllav Dikiq njihet për qëndrimet e tij radikale ndaj Kosovës dhe popullatës shqiptare si dhe për implikimin e tij dhe pjestarëve të policisë serbe në disa konflike me ushtarët e KFOR-it, për çka me kërkesë të ndërkombëtareve, Dikiq është shkarkuar nga pozita e komandantit të xhandarmërisë nga ana e ish-presidentit serb, Boris Tadiq. /tesheshi.com/
