Pas nenit 449 që vendosi parashkrimin dhe ndalimin e gjykimit për një vepër që ishte shqyrtuar një herë, një amnisti e re po përgatitet nga mazhoranca, e cila kaloi dje ligjin e ri antimafia.
Sipas këtij ndryshimi, është tërhequr versioni i SHBA-BE për sekuestrim pasurie edhe të njerëzve të rrethit familjar të nivelit të dytë – kur dihet se në këtë mënyrë i kanë regjistruar pronat shumë prej zyrtarëve – dhe tani do të sekuestrohen vetëm pronat e rrethit të bërthamës bazë familjes, pra grua dhe fëmijë.
Gjithccka ka ndodhur të premten në komisionin parlamentar të Ligjeve, ku fillimisht është diskutuar ligji për përgjimin, e ku paraprakisht është rënë dakord që autorizimi të jetë në dorë të Strukturës Speciale Antikorrupsion.
Aktualisht është Prokurori i Përgjithshëm ai që vendos gjithçka, pasi ka bërthamën e pajisjes së përgjimit. Mirëpo dje në komision është vendosur që të drejtën për përgjime ta ketë kryetari i Gjykatës së Apelit në SPAK.
Ligji është miratuar vetëm në parim, ndërsa dje u diskutua nen për nen dhe miratimi në tërësi u shty për ditën e martë. Dje pati diskutime mes palëve sa i takon nenit 8, i cili përcakton strukturën që autorizon përgjimin. Aktualisht, bërthamën e komandimit e ka Adriatik Llalla, por ditën e martë me ndryshimet ligjore pritet që ajo t’i kalojë prokurorisë së posaçme.
Kjo do të thotë se kryeprokurori do rrudhet nga çdo lloj kompetence. Kjo bëhet me qëllim që të vihen në përgjim pushtetarët e lartë kur ka raste për korrupsion. Sapo të ngrihet SPAK, të gjithë ata politikanë, ministra e ish-ministra që dyshohen për afera, mund të vihen nën survejim nga SPAK. Nga ana tjetër, dje i janë bërë një sërë ndryshimesh ligjit, pas vërejtjeve të Ministrisë së Drejtësisë. Vetë politika duket se ka amnistuar veten, pasi u ra dakord që përgjimet të jenë vetëm elektronike, pra përgjimi i telefonave dhe komunikimet në internet.
Vetëm në këto raste mund të ketë survejime dhe të shërbejnë si prova. Palët ranë dakord që të mos ketë përgjime ambientale në ambiente publike.
Ligji përcaktonte që të kishte përgjime dhe në kafene apo ambiente të caktuara por një gjë e tillë u hoq, duke u dhënë lirshmëri pushtetarëve të korruptuar.
Sekuestrimi i pasurisë
Dhe, pas diskutimit të ligjit për përgjimet, është kaluar te miratimi i ligjit antimfia. Më 11 prill, komisioni i Ligjeve bëri miratimin në parim të ligjit, ku paraprakisht u ra dakord që pjesë e këtij ligji të bëheshin dhe veprat e korrupsionit.
Në ligjin e hartuar nga ekspertët ndërkombëtarë parashikohej që të kishte sekuestrim pasurie deri te krushqitë dhe te kushërinjtë. Por deputetët e PS i kanë rrëzuar ndërkombëtarët, duke ngushtuar rrethin e personave që mund të ketë sekuestrim pasurie. Sipas ligjit, në momentin që një zyrtar dënohet për korrupsion dhe verifikohet që pasuria është vënë në mënyrë kriminale, atij do i sekuestrohet.
Por dje ligji ndryshoi dhe u vendos që pasuria të sekuestrohet vetëm në nivele familjare, pra bashkëshort, bashkëshorte, djalë e vajzë.
Ligji i ndërkombëtarëve parashikonte sekuestrim te dajat, xhaxhallarët, vjehrri, vjehrra, etj. Por deputetët i kanë hequr këto përcaktime dhe në një farë mënyre kanë amnistuar veten, pasi tani çdo politikan apo dhe kriminel do e ketë të lehtë ta fshehë pasurinë te kushërinjtë e tij.
Një tjetër përcaktim që u vendos ishte se në rast sekuestrimi, do i lihen një sërë objektesh imediate për jetën, siç mund të jetë një banesë, apo dhe objekte shtëpiake.
Ky është amnistimi i dytë që i bëjnë vetes politikanët, pas ndryshimeve në Kodin e Procedurës Penale. /tesheshi.com/
