Ambasadori i Kinës në Mbretërinë e Bashkuar e ka mohuar se fëmijët muslimanë në Xinjiang janë duke u ndarë sistematikisht nga prindërit e tyre.
Por një raport i BBC zbulon këto fakte të pamohueshme. Aty dëshmohet se qindra fëmijë nga grupi etnik i minoritetit ujgur ndahen nga të dy prindërit, qoftë në kampe ose në burg.
Në të njëjtën kohë, Kina ka nisur një fushatë në shkallë të gjerë për të ndërtuar shkolla – konvikte për fëmijët e ujgurëve. Kritikët thonë se kjo është një përpjekje për të izoluar fëmijët nga komunitetet e tyre muslimane. Megjithatë, ambasadori kinez Liu Xiaoming e mohon këtë ndarje.
“Nuk ka ndarje të fëmijëve nga prindërit e tyre. Aspak”, i tha ambasadori gazetarit të BBC-së, Andrew Marr. “Nëse gjeni njerëz që kanë humbur fëmijët e tyre, më jepni emra dhe ne do përpiqemi t’i gjejmë”, shtoi ai.
Dëshmitë e mbledhura nga BBC treguan se në një vendbanim të Xinjiang më shumë se 400 fëmijë kishin humbur të dy prindërit e tyre në një formë të internimit.
Autoritetet kineze pretendojnë se ujgurët janë duke u arsimuar në “qendrat e formimit profesional” të projektuara për të luftuar ekstremizmin.
Por dëshmitë flasin se shumë prej tyre janë duke u ndalur thjesht pse shprehin besimin e tyre duke falur namazin. Më shumë se një milion njerëz mendohet se mbahen brenda kampeve famëkeqe. /tesheshi.com/
