Të paktën 880 persona janë bërë viktima të mbytjeve në detin Mesdhe gjatë javës së fundit. Kjo shifër tragjike e viktimave gjatë rrugëtimit të tyre për në Europë është bërë e ditur nga një zëdhënës i Agjencisë së Kombeve të Bashkuara për refugjatët, Unhcr. Ai thotë se ky numër tregon që një në 23 migrantë ndërron jetë gjatë rrugës nga Afrika e veriut për në brigjet më të afërta të Europës, që janë ato të Italisë. Ndërsa, nëse llogarisim viktimat e fundit, i bie që gjatë një jave, çdo ditë kanë humbur jetën mbi 110 persona.
Në total, që prej fillimit të vitit kanë humbur jetën në Mesdhe 2510 refugjatë, që i bie rreth 655 më shumë krahasuar me të njëjtën periudhë të një viti më parë.
“Skafistët po shtohen çdo ditë e më shumë. Në varkat e tyre hipin refugjatët, ndërkohë që vetë skafistët nuk janë as të aftë t’i çojnë shëndosh në destinacion”, – ka thënë Ginevra William Splinder.
Sipas Unhcr, deri më tani 203.981 persona kanë nisur udhëtimin e tyre nga brigjet e Afrikës së veriut për në Europë dhe thuajse tre të katërtit e tyre, deri më 20 mars, kur hyri në fuqi marrëveshja e migrantëve mes BE-së dhe Ankarasë, kanë kaluar nga Turqia direkt në Greqi. /tesheshi.com/
