Më 20 shtator, rreth 4 milion njerëz në 161 vende të botës dolën në rrugë në demonstratën më të madhe për ndryshimin e klimës në histori.
Në krye të kësaj proteste globale ishte 16-vjeçarja Greta Thunberg, e cila ndodhet në qendër të vëmendjes globale falë aktivitetit të saj si drejtuese e një lëvizjeje rinore që po shtyn qeveritë dhe korporatat për të vepruar kundër krizës klimatike
Thunberg nisi lëvizjen “Të premtet për Ardhmërinë” – dhe Greva e Shkollës për Klimën (siç thotë suedisht pankarta e saj) – në vitin 2018, duke inkurajuar studentët të lënë shkollën për të kërkuar veprime mbi ndryshimin e klimës nga qeveritë e tyre. Në nëntor, kur ajo ishte një klasë të nëntë, organizoi një grevë për dy javë jashtë parlamentit suedez, duke kërkuar që qeveria të shkurtojë emetimet e gazrave për 15% në vit.
Tani Thunberg kalon çdo të premte në grevë.
Të hënën, Thunberg mbajti një fjalim plot pasion dhe me lot iu drejtua liderëve botërorë në Samitin e OKB-së për Veprim Klimatik.
“Krejt çfarë po bëni është e gabuar. Unë nuk duhej të isha këtu, por në shkollë, në anën tjetër të oqeanit”, tha ajo me lot në sy. “Megjithatë, ju vini te unë për shpresë? Si guxoni! M’i keni vjedhur ëndrrat dhe fëmijërinë me fjalët tuaja të zbrazëta.”
Për të marrë pjesë në takimin e OKB-së, Thunberg lundroi përtej Atlantikut në një varkë me emision zero për të shmangur emetimet e karbonit që do të kishin ardhur nga fluturimi.
Për katër minuta, Thunberg u duartrokit pa ndërprerë teksa fliste për nevojën për të ndëshkuar udhëheqësit që flasin për “përralla të rritjes së përjetshme ekonomike” në kurriz të njerëzve që vuajnë. “Njerëzit po vdesin. I gjithë ekosistemi po shkatërrohet”, tha Thunberg.
Thunberg ka menduar për ndryshimin e klimës dhe mungesën e veprimeve për ta frenuar atë që nga mosha 8-vjeçare, kur mësoi për herë të parë për problemin. Ajo ka thënë se nuk e kuptonte pse të rriturit nuk po punonin për të lehtësuar efektet.
Në maj të vitit 2018, Thunberg fitoi një konkurs nga një gazetë lokale për esenë me të mirë për ndryshimet e klimës.
Kjo ishte gjeneza e karrierës së saj mbi aktivizmin. Ajo filloi nismën “Shkolla proteston për Klimën” dhe nisi protestën e saj të parë tre muaj pas kësaj.
Thunberg ka sindromën Asperger-it, por nuk e fajëson gjendjen e saj shëndetësore. Në fakt, ia lë meritat për natyrën e saj aktive të aktivizmit. Ajo u diagnostikua me këtë sindrom katër vjet më parë.
Në një intervistë me gazetarin e BBC-së Nick Robinson, Thunberg tha se “të qenit ndryshe është një dhuratë”. Nëse ajo nuk do të kishte Asperger, nuk do të bëhej një aktiviste e apasionuar pas klimës.
Thunberg gjithashtu ka shkruar për gjendjen e saj, duke thënë se të kesh Asperger është një “superfuqi”.
Në dhjetor, Thunberg foli në konferencën e Kombeve të Bashkuara për ndryshimin e klimës së vitit, dhe tre muaj më vonë, në mars të këtij viti, nxiti më shumë se 1 milion studentë që të lënë orët e së premtes në protesta për ndryshimet klimatike.
Po në këtë muaj, Greta u nominua për çmimin Nobel te Paqes.
Fama e saj sillet në korridoret e institucioneve më të larta, por edhe në zyrat e politikanëve dhe klerit. Papa Francesku kohë më parë kishte shprehur mbështetjen e plotë për aktivisten duke e inkurajuar me fjalët “vetëm vazhdo”.
Edhe pse qarkullojnë shumë teori në internet se nga kush mund të jetë e mbështetur adoleshentja, ajo vet e mohon të ketë agjendë të huaj pas vetes, duke insistuar se po aktivizohet për hir të gjeneratës së saj që do të vuaj pasojat e gabimeve të gjeneratave të sotme.
Ajo thotë se gjithë shpenzimet e udhëtimeve i përballon familja e saj dhe konsultohet me shkencëtarët vetëm kur ka për të mbajtur fjalime ku i duhen të dhëna “shkundëse”. /tesheshi.com/
