Kur mediat perëndimore akuzojnë Moskën se përdor Sputnik-un dhe Rusia Today për të shpërndarë fake news-e çorientuese për opinionin, drejtuesit e këtyre mediave rrudhin buzët dhe reagojnë keq në rrjete sociale apo edhe në faqet e mediave të tyre.
Por kur sheh faqet e Sputnik në gjuhën serbe e cila mbulon Ballkanin, kryesisht për shkrimet për shqiptarët, gjen “gallata” dhe mufka sa të duash.
Njëra është botuar sot për shembull.
Portali i Kremlinit ka publikuar një shkrim të gjatë me autore “famozen” Brankica Ristiç, e cila ka hedhur në rrjet pa teklif fare, se “ekziston një projekt shqiptar që po ble të gjithë Serbinë e Jugut, dhe për këtë plan janë vënë në dispozicion 250 milionë euro”
Pra tamam-tamam çerek miliardi! Dhe Sputnik nuk ndalet, por vazhdon se Behgjet Pacolli, miliarderi më i famshëm shqiptar, aktualisht shef i diplomacisë së Kosovës dhe Ramush Haradinaj, kryeministër i Kosovës, e kanë zgjidhur qesenë e tyre e po blejnë shtëpi, troje e katandi, nga Nishi e gjithë rrethinat e tij, zona që para Marrëveshjes së Shën Stefanit populloheshin me shumicë nga shqiptarë.
Një model tipik sesi bëhet një fake news është ky shkrim i Sputnik, që shitet si analizë e thellë dhe qasje e stërmenduar.
Dhe mendo që Pacolli e Ramushi kanë nxjerrë nga xhepi 250 milionë euro për të blerë banesa në Serbi për shqiptarët!
Po ata nuk e kanë bërë as me 1% e kësaj shume në Kosovë, ku dalin çdo dy vjet e kërkojnë vota si për Kuvend ashtu edhe për komuna. Por përkundrazi, faktet flasin se fondet e taksapaguesve nuk janë përdorur si duhet për të mirën e Kosovën.
Ja ç’shkruhet ndër të tjera:
“Mediat janë plot me raporte se miliarderi më i pasur shqiptar Behgjet Pacolli, tani ministri i Jashtëm në Prishtinë, ka nxjerrë nga xhepi 250 milionë euro në të holla, të cilat ekstremistët shqiptarë në jug të Serbisë do t’i përdorin në muajt e ardhshëm për të blerë tokë e pasuri të patundshme por edhe biznese.
Kjo është vetëm faza e parë në përpjekjen për të realizuar projektin kriminal të ‘Shqipërisë së madhe’, siç raportohet nga shërbimet serbe të sigurisë.
Tema që shqiptarët po blejnë fshehurazi jugun e Serbisë dhe se sipas vlerësimeve lokale rreth 11,000 shqiptarë nga Kosova dhe Metohija kanë kaluar në zonën e Nishit në pesë vitet e fundit, është e rrahur nga ne prej kohësh.
Shqiptarët janë më të interesuar në zonën rreth Vranjas në Bujanoc përgjatë kufirit, por edhe në Toplica (Prokuplje, Kursumlija, Bllacë, …), më saktësisht, në fshatrat në afërsi të vijës administrative me Kosovën.
Vendasit po ua shesin shqiptarëve tokat e shtëpitë me çmime disa herë më të larta se sa bëjnë realisht”.
Pork jo është vetëm njëra anë e problemit, pasi më poshtë shkrimi i Sputnik fsheh diçka edhe më të rëndë, një plan për të hequr nga listat e gjendjeve civile shqiptarët e Luginës së Preshevës që ndodhen në kurbet.
Ja provokacija e portalit të Kremlinit:
“Në jug të Serbisë për shembull, në 15 vitet e fundit, gjithçka që është serbe është blerë. Sidomos në Bujanoc dhe Medvegjë. Në këto komuna ka shumë më tepër votues sesa qytetarë, që janë shtuar falë parave dhe mbështetjes së faktorit të huaj”.
Ky version i fakteve është tipik një fake news por edhe provokativ. Pasi numri më i madh i votuesve me atë të banorëve të komunave të Luginës është një fenomen thjesht i argumentuar: një pjesë e madhe e shqiptarëve ndodhen jashtë vendit në emigracion dhe janë qytetarë të Serbisë të regjistruar.
Por duket se qasja e Sputnik nuk është e vetme në këtë mufkë, pasi duket një plan i organizuar, ngaqë është mbajtur edhe një tryezë e rrumbullakët në Beograd për të shpëtuar nga “pushtimi i Serbisë nga shqiptarët”.
Në fakt, Serbia këtu ka një krizë reale që mundohet ta fshehë me propagandë që është papunësia e lartë dhe në rradhë të parë lindjet e ulëta që po zvogëlojnë pashmangshmërisht popullsinë, sidomos në zonat e pazhvilluara ekonomikisht, ku banorët largohen drejt Beogradit apo qyteteve të mëdha.
Vuçiç megjithatë e ka një plan dhe ka sjellë në këto zonë mjaft kompani të njohura si ajo e këpucëve Geox apo disa kompani nga SHBA.
Mediat serioze në serbi e trajtojnë me themel këtë problem dhe kërkojnë qasje më afatgjata, pasi fakenews vetëm mund të trullosin ca njerëz por jo të zgjidhin gjë. /tesheshi.com/
