Redaktorët e dy shtëpive botuese palestineze të lajmeve me bazë në Bregun e pushtuar Perëndimor, thonë se llogaritë e tyre në Facebook janë pezulluar javën e kaluar, duke mos u dhënë kurrëfarë arsyetimi.
Ata po përmendin mundësinë që profilet e tyre mund të jenë censuruar për shkak të një marrëveshjeje së fundmi në mes të gjigantit social amerikan dhe qeverisë izraelite në luftën kundër nxitjes së trazirave.
Javën e kaluar, katër redaktorë të agjencisë Shebab News dhe tri të Quds News kanë treguar se nuk po kanë mundësi të futen nëpër profilet e tyre personale të Facebook-ut.
Të dy agjencitë mbulojnë ngjarjet e përditshme nga territoret e pushtuara palestineze.
Facebook i është përgjigjur Quds News Network të shtunën duke i kërkuar falje, duke shpjeguar se mbyllja e profilit të tyre ka qenë aksidentale. Të tri profilet e gazetarëve të këtij portali janë zhbllokuar gjatë fundjavës, njofton Al-Khatib.
Ndërkaq, Remah Mubarek, drejtor i Shebab News Agency, ka thënë se katër profilet e redaktorëve të këtij mediumi janë bllokuar pa asnjë paralajmërim. “Profili i njërit prej redaktorëve mbetet akoma i bllokuar, ndërsa profilet tjera janë zhbllokuar të shtunën”, ka njoftuar Mubarek.
Al Jazeera ka kontaktuar me kompaninë Facebook në lidhje me këtë çështje, por nuk kanë marrë akoma asnjë përgjigje.
“Agjencia mbulon lajmet nga Bregu Perëndimor, Rripi i Gazës dhe brendia e Izraelit. Ndoshta ata nuk dëshirojnë që ne t’i mbulojmë gjitha këto lajme, veçanërisht Bregun Perëndimor, ku ka pasur ekzekutime së fundmi. Ndoshta ata dëshirojnë që të ndalojnë këto faqe me qëllim që të fshehin provat”, ka thënë Mubarek.
Al-Khatib tha se ky incident nuk është hera e parë që Facebook bllokon faqe të ngjashme.
Grupet për të drejta të njeriut thonë se aktivistët dhe gazetarët, e jo “terroristët”, janë shpesh shënjestër e akuzave për nxitje të dhunës. /tesheshi.com/
