Bashkimi bën fuqinë! E sidomos kur armiku që duhet mundur është terrorizmi online. Për këtë arsye, gjiandët e web-it, Facebook, Microsoft, Twitter dhe YouTube kanë vendosur të bëhen bashkë për të parandaluar përhapjen e përmbajtjeve terroriste online.
Kompanitë kanë dalë me një deklaratë të përbashkët ku thonë se “në shërbimet tona nuk kanë vend përmbajtjet që promovojnë terrorizmit. Kur e morëm vesh u vumë në lëvizje, në përputhje me politikën tonë kundër këtyre përmbajtjeve”.
Sipas asaj që shkruan Wall Street Journal, bashkëpunimi ndërmjet gjigandëve të internetit mund të jetë nxitur nga takimet e këtyre kompanive me autoritetet e Bashkimit Europian. Në fakt, në javët e kalura, Facebook, Twitter dhe YouTube i kanë premtuar komisioneres europiane Vera Jourova që të fshijnë brenda 24 orëve mesazhet online që nxisin urrejtje dhe terrorizëm.
Si do të përpiqen ta luftojnë terrorizmin kolosët e teknologjisë ?
Ata kanë krijuar një bazë të dhënash me imazhe dhe video me përmbajtje të dhunshme, propagandë apo që kanë të bëjnë me prozelitizmin, me synim përshpjetimin e heqjes së tyre nga web-i.
Në thelb, do të caktojnë një “shenjë hash” për përmbajtjet e dhunshme apo mesazhet që mund të përhapin ide raciste. Falë kësaj bazë të dhënash do të jetë e mundur gjetja e këtyre përmbatjeve në secilën platformë ku më pas secila kompani, në bazë të politikave të veta, do të vendosë t’i fshijë ose jo.
Sipas marrëveshjes, një video e bllokuar, fjala bie, në Twitter, nuk do të mund të shpërndahet në Facebook apo YouTube. Jo vetëm kaq, por baza e të dhënave do të jetë në gjendje të skanojë edhe përmbajtjen e atyre materialeve që janë duke u ngarkuar, duke u përpjekur të bllokojë mesazhet e dhunshme apo ekstremiste përpara se të ndahen me të tjerët./tesheshi.com/
