Nga Nada Dosti
“Makarona me salçiçe viçi” – shkolla profesionale ofron këtë menu tradicionale, si pjesë e një kurrikule të re. Qëllimi është afrimi i fëmijëve të huaj me kulturën zvicerane. Mirëpo nxënësja e quajtur Esma (nën rolin e të cilës aktron studentja Hava Fuga) nuk dëshiron të konsumojë këtë lloj salçiçeje (viçi lejohet të konsumohet nga muslimanët, por praktika e therrjes s’është muslimane, debat ky në film).
Pas diskutimeve të pasuksesshme me mësuesen dhe drejtorin e shkollës, Drejtoria e Arsimit ndërhyn për një zgjidhje të mundshme. Esmës i ofrohet kjo lloj alternative: ose të konsumojë ushqimin në fjalë ose të përjashtohet nga shkolla
Ky është skripti i videomesazhit, filmit me metrazh të shkurtër që dëshiron të ndërgjegjësojë mbi islamofobinë dhe të ashtuquajturin “integrimin e muslimanëve në Perëndim”.
Regjizorja e filmit në fjalë është Fitore Sinani nga Kosova. Ajo jeton në Bern ku dhe punon në një organizatë artistiko-kulturore.
Më 2014-tën përfundon praktikën e arkitekturës në GIBB (Shkolla Profesionale Tregtare-Industriale Olten). Pas tre vitesh diplomon në Fakultetin e Arkitekturës, në Universitetin e Shkencave të Zbatuara të Bernës në Burgdorf.
Në vitin 2019 ajo u diplomua edhe në degën Film dhe Dizajnit po në Bern.
Ideja për realizimin e filmit ka ardhur si dëshirë për ta kurorzuar të gjithë punën e tezës së diplomimit në një punë konkrete-praktike.
“Frymëzimi për temën erdhi si një domosdoshmëri për të pasqyruar ngjarje reale këtu në Zvicër, si përshembull momentalisht iniciativa e ndalimit të nikabit, që këtë dielë do të merret vendimi përfundimtar për ndalesën ose lejimin, ose dhe më herët debati mbi ndalimin e minareve në vitin 2009.” shprehet ajo.
Kur flet për realizimin e filmit shpjegon se një mbështetje e madhe ka qenë ekipi i saj i përbërë nga studentët e tjerë të të njëjtës degë, ku veçon Sven Uhlmann, dhe asistenten e saj Muriel Weyermann.
“Ky film ka qenë edhe punimi im i diplomimit në degën e Filmit dhe Regjizurës. Aktorët pjesmarrës janë të gjithë aktorë profesionalë zvicerianë, si mbështetje nga Projekti Mbështetje për Diplomim”, me përjashtim të aktores Hava Fuga, e cila është shqiptare nga Maqedonia e Veriut.
“Gjatë këtij projekti kam përvetësuar shumë, dhe jam shumë mirënjohesë për këtë ekip të mrekullueshëm që më shoqëruan gjatë këtij rrugëtimi të rëndësishëm për mua”, shpjegon Fitore Sinani. /tesheshi.com/
