Drejtori i përgjithshëm i kompanisë turke Baykar, e cila prodhon dronët Bayraktar, njoftoi të premten se kompania planifikon të ndërtojë një fabrikë në Ukrainë në dy vitet e ardhshme.
“Plani ynë po përparon. Aktualisht kemi një projekt arkitekturor. Faza e projektimit të detajuar ka përfunduar. Dhe së shpejti do të fillojmë ndërtimin. Ne duam ta përfundojmë brenda dy viteve”, tha Haluk Bayraktar në periferi të panairit të mbrojtjes SAHA në Stamboll.
Dronët Bayraktar të furnizuar në Ukrainë nga kompania Baykar ishin vendimtare në mbrojtjen e Ukrainës kundër sistemeve të blinduara dhe anti-ajrore ruse në javët e para të pushtimit rus, sipas Reuters.
Plani që Baykar të ndërtojë një fabrikë në Ukrainë është pjesë e një marrëveshjeje të nënshkruar midis Ankarasë dhe Kievit pak para sulmit të Rusisë në Ukrainë më 24 shkurt.
Bashkëpunimi me Gjermaninë
Prodhuesi kryesor turk i dronëve luftarakë, Baykar, dëshiron që Gjermania të jetë më e gatshme për të bashkëpunuar në industrinë e mbrojtjes.
“Ne kemi marrëdhënie solide në të gjithë sektorët e tjerë. Në mbrojtje duhet të merren më shumë masa, sepse nga kjo do të përfitonin të dyja palët”, tha për agjencinë DPA, drejtori ekzekutiv i kompanisë Haluk Bayraktar, siç raportojnë mediat gjermane.
Sipas tij, Gjermania është shumë e “kufizuar” përsa i përket teknologjisë së mbrojtjes.
Baykar prodhon, ndër të tjera, dronin luftarak Bayraktar TB2, të cilin Ukraina po e përdor aktualisht në luftën kundër Rusisë. Më parë është përdorur nga Azerbajxhani kundër Armenisë si dhe në Siri e Libi.
Bayraktar tregon se ky dron është eksportuar në 24 vende të botës. /tesheshi.com/
