Në fillim të sezonit futbollistik ende në vijim, askujt nuk i shkonte në mendje që Jose Mourinho do të shkarkohej për rezultate të dobëta e që skuadra kampione e Çelsit do të gjendej në fund të renditjes.
Portugezi u shkarkua në dhjetor të 2015-ës, shtatë muaj pasi Çelsi fitoi trofeun e Premier Ligës. Skuadra londineze gjendej vetëm një pikë mbi zonën e rënies nga kategoria.
Mesfushori i Çelsit, lojtari i përfaqësueses spanjolle, një ish-lojtar i Barcelonës, Cesc Fabregas, ka dhënë më në fund shpjegimin e vet për gjithçka ndodhi muaj të shkuar.
Sipas spanjollit, Mourinho e humbi punën e tij sepse besoi shumë te lojtarët.
“Problemi më i madh ishte se ai besoi shumë tek ne, na dha më shumë pushime sepse ishim kampionë, dhe ne e lamë në baltë.”
“Kjo ishte arsyeja kryesore e largimit të tij, dhe unë e ekipi ndjehemi keq për këtë.”
Fabregas ka qenë gjithmonë i parapëlqyer nga Mourinho, me një marrëdhënie vazhdueshmërisht të ngrohtë mes tyre.
“Kam respekt të madh për të,” ka treguar Fabregas, “ne ende komunikojmë dhe tani.” /tesheshi.com/
