Nico Rosberg, piloti gjerman i Mercedes-it, fitoi këtë pasdite për herë të parë në Spa-Francorchamps, në garën e Belgjikës. Kjo ishte fitorja e gjashtë për të në këtë sezon, dhe e njëzeta në karrierë.
Një garë e nisur me shumë incidente, që në metrat e para. Do të ishin fillimisht Vettel, Verstappen e Raikkonen që do të ngjiteshin me njëri-tjetrin, duke i dëmtuar makinat, për t’i hapur rrugën Ricciardo-s në vend të dytë.
Rosberg do të bënte një start mjaft të mirë, ndryshe garave të shkuara, duke e ruajtur vendin e parë. Mes
një sërë incidentesh të tjera, do të vinte ai i xhiros së gjashtë, kur Kevin Magnussen do të humbtte kontrollin e Renault-it të tij, për t’u përplasur me muret mbrojtëse prej gomash. Fati i tij që përplasja nuk ishte ballore, pasi nga makina mbeti një grusht hekurash. Piloti u dërgua më pas në spital, por ai doli gjithsesi me këmbët e tij nga makina e shkatërruar tërësisht.
Pezullimi i plotë i garës për më tepër se 15 minuta i dha mundësinë Hamilton-it të nisur nga fundi që të shfaqej mes makinave të kreut, ashtu si dhe Alonso.
Gara do të vijonte më pas pa u ndërprerë më, por midis pilotëve do të kishte disa fërkime, siç ishte ai mes Raikkonen-it dhe Verstappen-it.
Në fund, Rosberg do ta kalonte i pari finishin, i ndjekur nga Ricciardo e Hamilton. Në dhjetëshen e parë do të ishin dhe Hulkenberg, Perez, Vettel, Alonso, Bottas, Raikkonen e Massa.
Rosberg mundi veç ta shkurtojë diferencën në pikë me kryesuesin e kampionatit, pa ia dalë ta lërë pas. Hamilton ka 232 pikë pas 13 garash, ndërsa Rosberg ka 223.
Gara e ardhshme është pas një jave në Monza të Italisë. /tesheshi.com/
