Nico Rosberg do të ketë mundësinë nesër t’u japë fund dy fitoreve të njëpasnjëshme të shokut të skuadrës e të rivalit më të egër të tij, Lewis Hamilton-it, që do ta kalonte i pari finishin në Montekarlo e Kanada.
Në provat zyrtare në Çmimin e Madh të Europës, në pistën debutuese në Baku të Azerbajxhanit, Rosberg ka dalë i pari në provat zyrtare.
Mes rrugëve piktoreske të Bakusë, ku ndesh të shkuarën dhe të tashmen moderne të kryeqytetit azer, gjermani ia ka dalë të renditet i pari, për të pretenduar nesër fitimin e garës. Në suksesin e tij ka ndihmuar dhe vetë Hamilton-i, që është përplasur me muret mbrojtëse pranë fundit të provave. Britaniku do ta nisë nesër garën nga vendi i dhjetë.
Ka surprizuar Sergio Perez, që me Force India-n e tij është renditur sot i dyti. Por nesër ai do të niset i shtati, për shkak të një penalltie për ndërhyrje në kutinë e marsheve.
Daniel Ricciardo ka plotësuar treshen fituese të provave, me dy pilotët e Ferrari-t, Vettel e Raikkonen, pas tij.
Hapa mbrapa ka bërë McLaren-i i pilotuar nga Alonso, që ndryshe, provave të shkuara, nuk ia ka dalë këtë herë të jetë pjesë e dhjetëshes së parë.
Penalltia e Perez-it i jep tjetër formë kësaj dhjetëshe. Rosberg, Ricciardo, Vettel, Raikkonen, Massa, Kvyat, Perez, Bottas, Verstappen e Hamilton do të jenë dhjetë pilotët e parë në garën e së dielës, e teta sezonale në Formula 1. /tesheshi.com/
