Lewis Hamilton i mban gjallë shpresat për t’u shpallur kampion me një fitore në Çmimin e Madh të Brazilit, në një prej garave më të paparashikueshme të këtij sezoni.
Shiu thuajse i pandërprerë, aksidentet e njëpasnjëshme, dy herë flamuri i kuq dhe pezullimi i garës, pesë herë hyrja në pistë e makinës së sigurisë; të gjitha këto kanë ngjarë këtë pasdite në më tepër se tre orë, gjatë së cilave gara herë ka pushuar e herë ka vijuar.
Kjo qe gara e tretë rresht e fituar nga britaniku, pas atyre në SHBA e në Meksikë, dhe e nënta gjatë këtij kampionati. Diferenca e Hamilton-it me Rosberg-un, pilotin e vendit të parë në klasifikim, është tani 12 pikë, duke e lënë të hapur garën për titull.
Gjermani Nico Rosberg ruajti nervat në një garë mjaft të tensionuar për të, duke e kaluar finishin i dyti. Për të mjafton një vend i treti në Abu Dhabi pas dy javësh, edhe nëse Hamilton del i pari, dhe ai do të shpallet për herë të parë kampion bote në Formula 1.
Max Verstappen, holandezi i Red Bull-it, qe pa dyshim më spektakolari sot. Parakalimi fantastik i Rosberg-ut, por dhe një mbajtje e makinës në pistë pas një rrëshqitjeje, një veprim akoma më fantastik, ishin dy prej gjërave më pikante të Verstappen-it në Brazil.
Për të mos harruar lamtumirën e Felipe Massa-s, pas përplasjes në xhiron e 49-të. Braziliani largohet
nga Formula 1 në fund të sezonit, dhe sot ishte pilotimi i tij i fundit në garën e shtëpisë.
“Obrigado Massa!”
“Faleminderit Massa!” Piloti simpatik shpërtheu në lot teksa u përshëndet kësisoj nga turma gjigande e brazilianëve.
Dhjetëshen e parë në garën e Brazilit e plotësuan Perez, Vettel, Sainz, Hulkenberg, Ricciardo, Nasr e Alonso.
Gara e fundit do të zhvillohet në Abu Dhabi më 27 nëntor. /tesheshi.com/
