Diferenca 43-pikëshe mes Rosberg-ut dhe Hamilton-it nuk është më. Gjermani i fitonte katër garat e para sezonale në Formula 1: në Australi, Bahrejn, Kinë e Rusi. Dukej se Rosberg-u këtë herë ishte nisur me këmbë të mbarë, aq sa shumë ndjekës të këtij sporti e bënë fakt të kryer shpalljen kampion të tij në fund të këtij kampionati.
Pas dymbëdhjetë garash, situata është përmbysur fund e krye. Eshtë Hamilton ai që kryeson renditjen botërore, tanimë me 19 pikë më shumë se Rosberg-u.
Katër garat e fundit kanë parë të parin në finish pikërisht atë, britanikun që nuk dorëzohet kurrë. Fitues u shpall ai në Austri, Britani, Hungari e Gjermani. Edhe pse në dy garat e fundit do të nisej pas Rosberg-ut.
Gjermani do të bënte një nisje katastrofike sot, duke i përfunduar i katërti në kthesën e parë pasi qe nisur në krye. Rosberg do të përpiqej fort për të rikuperuar vendet e humbura, por edhe kur do ta parakalonte Verstappen-in, do të merrte një penallti me pesë sekonda për një manovër të gabuar në pistë.
Hamilton do të bënte një garë pa asnjë gabim, duke triumfuar në Hockenheim. Pas tij do të vinin dy Red Bull-ët, Ricciardo e Verstappen.
I pafuqishëm për të konkurruar Ferrari, që dalëngadalë po lëshon terren. Një vend i pestë për Vettel-in, e një i gjashtë për Raikkonen-in.
Force India ia doli t’i kishte dy pilotët në dhjetëshen e parë. Hulkenberg do ta kalonte finishin i shtati, ndërsa Sergio Perez do të renditej i dhjeti.
Një vend i tetë për Button-in e McLaren-it, e një i nëntë për Bottas-in e Williams-it.
217 pikë ka Hamilton në renditje, 198 ka Rosberg-u. I treti vjen Ricciardo, me 133 pikë.
Te renditja e konstruktorëve, Mercedes-i është i padiskutueshëm në vend të parë, me 415 pikë. Red Bull-i i vendit të dytë ka 256 pikë, 14 më shumë se Ferrari, që zbret në vend të tretë.
I tërë gushti do të jetë thuajse pushim, me garat që kthehen në fund të tij. Ajo e ardhshmja, e trembëdhjeta, do të zhvillohet në Belgjikë më 28 gusht. /tesheshi.com/
