Ka qenë mjaft domethënëse fitorja e Lewis Hamilton-it në Austin të SHBA-së. Veç mundësisë që i jep kjo fitore britanikut për të luftuar ende për titull, ajo është e 50-ta në karrierën e tij. Me këtë fitore ai mbetet vetëm pas dy emrave të mëdhenj të Formulës 1, Alain Prost-it, që ka 51 fitore, e Michael Schumacher-it, i cili është i pakapshëm me 91 fitoret e tij.
Lewis Hamilton, një ekspert tashmë i Çmimit të Madh të Shteteve të Bashkuara, e fitoi atë për herë të pestë mbrëmë, duke e ngushtuar diferencën në 26 pikë me rivalin kryesor. Britaniku nuk fitonte që në fund të korrikut, që nga gara në Gjermani, dhe triumfi i mbrëmshëm ka ardhur në momentin e duhur.
Nico Rosberg-ut iu desh ta mbyllte garën në vendin e dytë nëpërmjet strategjisë, pasi e kishte humbur atë që në nisje, kur u parakalua nga Ricciardo.
Australiani u kënaq me vendin e tretë në podium, i merituar për të dhe Red Bull-in.
Gara shkoi keq për dy pilotë që dhuruan momente të bukura gjatë saj, për Raikkonen-in dhe Verstappen-in, të cilët u detyruan të tërhiqen për shkak të problemeve në makinat e tyre.
Në vend të katërt përfundoi Vettel i Ferrari-t, i ndjekur nga një tjetër ish-ferrarist, Fernando Alonso, i pesti me McLaren-in e vet.
Sainz, Massa, Perez, Button dhe Grosjean plotësuan dhjetëshen e parë në finish në garën e Austin-it.
Formula 1 zhvendoset në fund të kësaj jave në Meksikë, në të tretën garë nga fundi. /tesheshi.com/
