Ezani, thirrja muslimane për namaz, u dëgjua sot për herë të parë nga një xhami në Këln, një nga më të mëdhatë në Gjermani, por me volum të kufizuar – e gjitha si pjesë e një projekti të rënë dakord me autoritetet në qytetin ku jeton një nga komunitetet më të mëdha myslimane të këtij vendi evropian.
Autoritetet në qytetin e katërt më të madh të Gjermanisë vitin e kaluar hapën rrugën për xhamitë për të kërkuar leje për të transmetuar ezanin për një maksimum prej pesë minutash mes mesditës dhe orës 15:00 të premteve, me volum të kufizuar për secilën xhami sipas vendndodhjes së saj.
Ezani i sotëm nuk është i pari në Gjermani, por ngjarja e sotme u zhvillua në një vend adhurimi veçanërisht të shquar.
Xhamia Qendrore, një ndërtesë moderne me dy minare të larta, ndodhet në një rrugë të ngarkuar në lagjen Ehrenfeld, afër qendrës së qytetit. Një ndërtesë masive prej xhami dhe betoni, e modeluar sipas një sythi lulesh, ka hapësirë për 1200 adhurues.
Ajo menaxhohet nga Unioni Turko-Islam për Çështjet Fetare (DITIB), dhe u hap nga Presidenti turk Rexhep Tajip Erdogan në vitin 2018.
Ezani deri më sot dëgjohej vetëm brenda xhamisë.
Gjermania është shtëpia e më shumë se pesë milionë muslimanëve, që është afër gjashtë për qind e popullsisë. Më shumë se 100,000 muslimanë jetojnë në Këln, i famshëm për katedralen e saj madhështore. /tesheshi.com/
