Raketat kanë goditur sot një zonë të banuar në anën turke të kufirit me Sirinë. Ato kanë ardhur nga Xherablusi, në anën siriane, që është nën kontrollin e ISIS-it.
Banorët e Karkamëshit u njoftuan fillimisht nga bashkia që të qëndrojnë brenda shtëpive, ndërsa policia ka kërkuar më pas përmes thirrjeve nga altoparlantët që ata të evakuoheshin për arsye sigurie.
Forcat e Armatosura Turke i janë përgjigjur zjarrit duke i goditur objektivat e ISIS-it në Xherablus, ndërkohë që janë goditur dhe pozicionet e PYD-së, krahut sirian të PKK-së.
Ushtria e Lirë Siriane pritet të nisë së shpejti mësymjen për çlirimin e Xherablusit, dhe, siç ka njoftuar ministri i Jashtëm turk, Mevlyt Çavushogllu, Turqia është gati t’i japë çdo lloj mbështetje këtij operacioni.
Në një konferencë shtypi në Ankara me homologun hungarez, Çavushogglu deklaroi se Turqia dëshiron që ISIS-i të mos ekzistojë në Siri e Irak, e se Turqia do të japë çdo kontribut për largimin e organizatës terroriste nga vendet fqinje. /tesheshi.com/
