Një 44-vjeçar vdiq të enjten në Itali në rastin e parë të eutanazisë së asistuar me ndihmë mjekësore në atë vend, raporton Deutsche Welle.
Ai, i paralizuar nga qafa e poshtë është personi i parë në Itali që merr miratimin nga gjykata për vetëvrasje, pra eutanazi me ndihmë mjekësore.
Edhe pse teknikisht është kundër ligjit të ndihmosh dikë të marrë jetën në Itali, Gjykata Kushtetuese e vendit vendosi në vitin 2019 se mund të ketë disa përjashtime – megjithëse në kushte strikte.
Federico Carboni, identiteti i të cilit u zbulua pas vdekjes së tij, ndërroi jetë të enjten pasi i dha vetes një koktej vdekjeprurës përmes një pajisjeje speciale.
Familja dhe miqtë e tij ishin me të kur ai ndërroi jetë.
Vdekja e Carbonit u njoftua nga shoqata Luca Coscioni, një grup që lufton për legalizimin e eutanazisë dhe që e ndihmoi atë të niste çështjen e tij para gjykatave dhe institucioneve shëndetësore.
Federico Carboni, një shofer kamioni 44-vjeçar, mbeti i paralizuar nga qafa poshtë 10 vjet më parë pas një aksidenti me makinë.
“Nuk e mohoj që jam penduar që i kam thënë lamtumirë jetës. Bëra gjithçka që munda për të jetuar sa më mirë pavarësisht paaftësisë sime, por tani kam arritur në fund të fuqisë sime, si mendërisht ashtu edhe fizikisht”, tha Carboni para se të ikte nga kjo botë me vullnetin e tij.
Si një tetraplegjik, ai kishte nevojë për kujdes 24 orësh, duhej të mbështetej te njerëzit e tjerë dhe nuk kishte pavarësi, shpjegoi ai, gjë që e bënte të ndihej si “një varkë që noton në oqean”.
“Tani më në fund jam i lirë të fluturoj kudo që dua,” tha Carboni.
Në vitin 2019, Gjykata e Lartë italiane hapi rrugën për vetëvrasje të asistuar në disa raste. Kjo çështje u kundërshtua ashpër nga Kisha Katolike Romake dhe partitë politike konservatore.
Gjykata renditi disa kushte që duhet të plotësohen për të konsideruar vetëvrasjen e asistuar. Për shembull, duhet të jetë e qartë se pacienti nuk mund të shërohet, apo se pacienti përjeton “dhimbje të padurueshme fizikisht dhe mendërisht”.
Pacienti gjithashtu duhet të jetë plotësisht i aftë të marrë vendimet e tij dhe të kuptojë pasojat.
Carboni mori lejen nga komisioni i etikës nëntorin e kaluar, pasi kapërceu një refuzim fillestar nga institucionet shëndetësore dhe vendosi ta çojë çështjen e tij në gjykatë. Kështu ai u bë personi i parë në Itali që mori miratimin e gjykatës për eutanazinë e asistuar.
Më pas iu desh të mblidhte 5000 euro për të mbuluar shpenzimet e barnave dhe pajisjeve speciale të nevojshme për t’i dhënë fund jetës së tij.
Vetëvrasja e asistuar është një procedurë e lejuar në Zvicër prej dekadash. Kjo praktikë është e ligjshme edhe në disa vende të tjera, duke përfshirë Holandën, Luksemburgun, Spanjën dhe Belgjikën. /tesheshi.com/
