Me dy ndeshjet e grupit F u mbyll dhe xhiroja e sfidave të para në Euro 2016. Ndryshe ditëve të tjera, e marta ka patur vetëm dy takime, e ato kanë qenë të këtij grupi. Asnjë prej tyre nuk ka patur në fund rezultatin e parashikuar. Kanë vuajtur Austria e Portugalia, dy pretendentët në letër, e kanë marrë pikë të çmueshme Hungaria e Islanda.
Austria, që kishte bërë një fazë të shkëlqyer eliminatore, duke kryesuar bindshëm në grupin G, pa asnjë humbje e me vetëm pesë gola të pësuar, u dorëzua dje ndaj Hungarisë, e cila do të vinte në këtë Europian si e treta më e dobët mes atyre skuadrave që fitonin të drejtën për ta kaluar grupin eliminator.
Por historia e afërt nuk do të kishte vlerë. Hungaria, me lojtarin më të vjetër që luan në një kampionat europian, portierin Kiraly, dyzet vjeç e kusur, do fitonte pastër, 2-0, duke bërë një nisje të shkëlqyer në Francë.
Austriakët do të rrezikonin fillimisht me Alaba-në, për t’u mjegulluar më pas në lojën e tyre. Tensioni i tepër do t’i linte dhe me dhjetë lojtarë që prej minutës së 66-të, kur Dragovic do të nxirrej jashtë me të kuqe.
Golat për hungarezët u shënuan nga Szalai dhe Stieber, përkatësisht në minutën e 62-të dhe të 87-të.
Fitorja 2-0 i bën hungarezët kryesues të grupit F.
Portugalia do të bënte gjithçka ndaj debutuesve të Islandës, por assesi nuk do t’i merrte tre pikët e plota. Ka qenë ajo e mbrëmshmja një betejë e vazhdueshme e sulmit portugez dhe mbrojtjes islandeze.
Nani do të zhbllokonte rezultatin në minutën e 31-të, duke i kaluar në epërsi portugezët. U duk se
gjithçka më pas do të qe e lehtë për ta, por nuk qe e thënë. Debutuesit islandezë do të barazonin pesë minuta para fillimit të pjesës së dytë, me golin të realizuar nga Bjarnason.
Të gjitha sulmet e mëpastajme të portugezëve do të ishin të pafrytshme, ndërsa rezultati 1-1 mbeti gjer në fund të takimit.
Ronaldo do të tregohej i ashpër me islandezët pas takimit. “Ishte paksa zhgënjyese. Ne u përpoqëm ta fitonim lojën, Islanda nuk u përpoq për asgjë.”
Sot nisin takimet e dyta në grupe. /tesheshi.com/
