Pothuajse tridhjetë eurodeputetë, kryesisht nga parti të ekstremit të djathtë, do të jenë delegacioni i parë ndërkombëtar që viziton Kashmir të administruar nga India, që prej bllokadës së sigurisë të vendosur ndaj rajonit me shumicë myslimane në gusht.
Qeveria e kryeministrit indian Narendra Modi ka hequr autonominë e Kashmirit në 5 gusht, një veprim që ka pasuar një goditje nga forcat e sigurisë ndaj disidentëve për të shuar protestat.
Dhe ndërsa qeveria indiane e mbështet vizitën, Parlamenti Evropian dhe kupola e Bashkimit Evropian nuk janë të përfshirë, duke çuar në disa dyshime diplomatike. Disa ambasada evropiane në New Delhi nuk ishin në dijeni të kësaj vizite deri të hënën.
“Delegacion i eurodeputetëve nuk është për një vizitë zyrtare në Indi, por ata po vijnë këtu me ftesë të një grupi joqeveritar”, tha një zyrtar i BE-së në Indi, në kushte anonimiteti.
“Ne nuk organizojmë asnjë nga takimet e tyre”, shtoi ai.
Ministrja e Jashtme Federica Mogherini kishte ngritur më parë çështjen e “kufizimit të lirive themelore” në Kashmir gjatë një takimi me ministrin e Jashtëm indian.
Pakistani, i cili e pretendon rajonin porsi India, dënoi ndryshimin e statusit dhe paralajmëroi se kjo mund të sjellë reagime të ashpra.
Mosmarrëveshja në Kashmir ka shkatërruar marrëdhëniet midis dy vendeve që posedojnë armë bërthamore dhe ndezën dy nga tre luftërat e tyre.
Një delegacion i BE-së me 27 politikanë nga njëmbëdhjetë vende do të takohet me zyrtarë qeveritarë dhe vendas për të vlerësuar situatën në Kashmir, tha një zyrtar indian.
Vizita vjen pasi anëtarët e Kongresit amerikan ngritën shqetësimin për mungesën e diplomatëve dhe mediave të huaja në rajonin e diskutueshëm. Kongresmeni amerikan Chris Van Hollen nuk u lejua të vizitojë Srinagar, kryeqytetin e Kashmir, në fillim të këtij muaji.
New Delhi gjithashtu ka refuzuar të lejojë gazetarët e huaj të mbulojnë situatën në Kashmir pas vendimit të 5 gushtit, sipas gazetës Hindu. Raportuesit specialë të Kombeve të Bashkuara për të Drejtat e Njeriut, kritikuan gjithashtu Nju Delhin për ndalimin e tyre për të vizituar rajonin.
Ligjvënësit e BE-së u takuan me Modin të hënën, të cilët thanë se vizita do t’u jepte atyre një pasqyrë të qartë të përparësive të rajonit, tha zyra.
Modi, i cili realizoi lëvizjen më të madhe politike në Jammu dhe Kashmir që nga rebelimi i armatosur që shpërtheu në vitin 1989, tha se të drejtat e veçanta për Kashmirin, siç është ndalimi i të huajve për të blerë pronë, pengojnë zhvillimin e tij.
“Një vizitë në Jammu dhe Kashmir duhet t’i japë delegacionit një kuptim më të mirë të larmisë kulturore dhe fetare të rajoneve Jammu, Kashmir dhe Ladakh”, tha Modi.
Një zyrtar indian tha se vizitat e grupit të BE do të hapë derën dhe për të tjerët për ta vizituar.
India po përpiqet të përballet me Pakistanin në skenën ndërkombëtare. Islamabad ka akuzuar New Delhi për shkaktimin e genocidit në Kashmir. /tesheshi.com/
