Samiti i Amsterdamit mblodhi 28 ministrat e brendshëm të Bashkimit Europian në një përpjekje si u tha, për të shpëtuar Shengenin dhe lëvizjen e lirë brenda bllokut përballë presionit që vjen nga kriza e refugjatëve. Sicc raportohet në mediat ndërkombëtare, në tryezë është hedhur propozimi i Komisionit Europian për të krijuar një trupë rojesh kufitare që do të menaxhojë fluksin e emigrantëve që vijnë nga Mesdheu.
Ndërkaq, në diskutim është edhe një propozim për të pezulluar marrëveshjen Shengen të lëvizjes së lirë ndërsa ministrant diskutojnë krizën e refugjatëve dhe luftën kundër terrorizmit, dy tema që prej kohësh janë bërë të pandashme në samitet europiane.
Siç shpjegon ministrja e Brendshme austriake, Johanna Mikl-Leitner në një intervistë për gazetën gjermane, “Die Welt” në diskutim është edhe përjashtimi i përkohshëm i Greqisë nga traktati i lëvizjes së lirë të njerëzve.
Kjo hipotezë është hedhur poshtë nga zëdhënësja e Komisionit Europian, Natasha Bertaud e cila tha se nuk ekziston as mundësia e ndërmarrjes së një veprimi të tillë për shkak të rregullave aktuale mbi kufijtë.
Presion mbi Greqinë
Fjalët e zëdhënëses nuk kanë shërbyer që të qetësojnë klimën. Greqia po akuzohet se nuk ka qenë në gjendje të kontrollojë fluksin e të sapombërriturve: vendi është porta kryesore e hyrjes së dy mijë refugjatëve që për ccdo ditë mbërrijnë në Europë, të cilët nisen nga brigjet turke e kalojnë përmes Kroacisë dhe Sllovenisë.
Vende të ndryshme bëjnë presion mbi Greqinë të rrisë kontrollin mbi emigrantët që mbërrijnë në brigjet e saj e disa prej këtyre vendeve kërcënojnë se dëshirojnë ta shohin atë jashtë zonës Shengen.
Ministri i Brendshëm gjerman, Thomas de Maizière, duke hyrë në samit deklaroi: “Do të bëjmë presion mbi Greqinë derisa të bëjë detyrat e veta”. E më pas ka shtuar se do të shihen rezultatet që do të arrihen në javët në vazhdim. “Duam ta ruajmë Shengenin. Duam zgjidhje të përbashkëta europiane, por koha nuk pret”.
Athina: Mjaft me akuza!
Athina, ndërkaq, kërkoi që të “hiqet dorë nga loja e padrejtë e akuzave”, pasi sipas saj, duhet që të gjitha masat europiane të riaktualizohen.
Mangësitë dhe vonesat, ka thënë ministri i Politikave migratore, Yoannis Mouzalas, në shumë raste nuk varen nga Athina. Komisioneri i BE-së për emigrantët, Dimitris Avramopoulos, që është grek, u përpoq të zvogëlojë rrezikun e përjashtimit të vendit nga Shengenit.
“Nuk ka asnjë propozim apo diskutim të tillë. Ajo që duhet të bëjmë është të menaxhojmë më mirë kufijtë tanë të jashtëm. Eshtë e dukshme se shtetet anëtare që kufizojnë së jashtmi BE-në duhet të bëjmë më shumë. Jemi këtu për t’i ndihmuar të bëjnë më mirë punën e tyre”, shtoi ai.
Sipas tij, rrezikohet uniteti në Europë, duke shtuar se Komisioni ka vendosur në tryezë dy axhenda shumë ambicioze për emigracionin dhe sigurinë.
Edhe ministra të tjerë europianë e kanë vënë theksin tek sigurimi i kufijve të jashtëm të Bashkimit Europian.
Marrëveshja brenda qershorit
Samiti i Amsterdamit, i pari nën presidencën holandeze të BE-së, nuk ka dalë më vendime konkrete por ka shtruar rrugën për një arritur një marrëveshje politike brenda qershorit. Në tryezë është roli që duhet të luajë agjencia europiane e kufijve të jashtëm dhe mundësia e ndërhyrjes në njërin shtet anëtar kur bëhet e qartë që ky shtet anëtar nuk është më në gjendje të mbajë nën kontroll situatën.
Protestat
Ministrat në samitin e Amsterdamit janë pritur me protesta në kryeqytetin holandez, pasi aktivistë të organizatës Amnesty International kishin inskenuar një varkë plot me manekinë të veshur me jelekë shpëtimi që përfaqësonin emigrantët që mbërrijnë në Europë. “Liderë europianë, nuk duhet të shqetësoheni nga sondazhet por nga librat e historisë”, lexohej në një prej parullave.
Përgatiti: Juli Prifti – /tesheshi.com/
