Rreshjet e mëdha të borës dhe të ftohtit e akullt kanë mbërthyer gjithë kontinentin evropian ditën e shtunë duke shkaktuar dhjetra të vdekure e anuluar numër të konsiderueshëm fluturimesh, ndërkohë që disa tragete në Itali dhe në Turqi janë dëmtuar nga faktorë atmosferikë.
Të paktën 10 njerëz kanë vdekur nga të ftohtit në Poloni në ditët e fundit, përfshirë shtatë burra të moshës mes 41 dhe 66 vjeç, sipas zyrtarëve. Ndërsa një 51-vjeçar ka vdekur nga monoksidi i karbonit nga një ngrohës jo-funksional.
Temperaturat kanë rënë nën -20 gradë celsius të shtunën, dhe parashikimet e motit janë të atilla që ato do të vijojnë të dominojnë dhe më tej në këto kuota.
Në Belgjikë, një njeri vdiq të shtunën kur kamioni i tij rrëshqiti në autostradë.
Në Itali, temperaturat nën minus u janë bërë shkak për vdekjen e disa njerëzve të pastrehë, ndërsa dëbora e madhe dhe erërat e forta rezultuan me anulim të fluturimeve, vonesa të anijeve, anulim të trenave dhe mbyllje të rrugëve, njoftuan mediat.
Disa shkolla janë urdhëruar të mbyllen të hënën në jug të Italisë, e cila ishte varrosur deri nën një metër borë, njoftoi agjencia e lajmeve ANSA.
Temperatura ka rënë në -7 gradë celsius në qytetin e dytë më të madh të Greqisë, në Selanik, dhe pritet të bijnë -10 gradë celsius të dielën, sipas institutit meteorologjik norvegjez.
Disa ishuj grekë, të njohur përndryshe për mot me diell dhe të ngrohtë, u mbuluan me borë, me temperatura të akullta.
Bora e madhe pushtoi edhe Stambollin, gjë që ka detyruar kompaninë ajrore Turkish Airlines që të anulojë më shumë se 650 fluturime. Agjencia shtetërore e lajmeve Anadolu njoftoi se edhe ngushtica e Bosforit e cila kalon nëpër qytetin më të madh të Turqisë u mbyll, me ndërprerje të qarkullimit të anijeve.
Agjencia private turke e lajmeve Dogan, raportoi se një nga autostradat kryesore në Stamboll është kthyer praktikisht në parking, pasi shoferët kanë braktisur makinat e tyre natën e së premtes duke u detyruar që të drejtohen në këmbë për në shtëpi në vend sq të luftojnë me borën dhe rrugët e rrëshqitshme.
Ndërsa vetëm Britania e Madhe e kaloi lehtshëm të ftohtit dhe dëborën, me qiellin e saj të zakonshëm ngjyrë gri dhe temperatura prej 10 gradë celsius.
Pra dhe në këtë rast, në një mënyrë ironike Brexit u shfaq jo politikisht por klimatikisht. /tesheshi.com/
