Një lajm mbi transport gazi në Europë nga gazjellësi TAP, ka çuar në gjoksrrahje ish-kryeministrin Berisha. Ky gazsjellës, një pjesë e të cilit kalon në Shqipëri, përcjell gaz nga Ajzerbaxhani në Europë, pa u përzjerë fare me gazin rus apo me gazsjellësit e tjerë.
Berisha, firmosës i këtij gazsjellësi për pjesën shqiptare, ka pretenduar se u ka rezistuar presioneve apo ofertave të nëndheshme ruse, për ta bërë të tyrin dhe këtë rrugë gazi.
“Ka qenë shumë e vështirë, sepse gazi më shumë se çdo materie tjetër është politikë. Politika dhe gazi janë të lidhura. Kurorëzimi i këtij gazsjellësi i cili përjashtonte gazin rus dhe ‘digjet’ projektin e South Stream, korridorit jugor të gazit të parashikuar nga Rusia. Përjashtimi i këtij projekti ishte fillimisht në kufijtë e të pamundurës, sepse Rusia dhe jo vetëm, lobimi i gazit rus shumë i fuqishëm në Turqi, Greqi, Itali, kishin projektin e tyre.
E dyta, siç ma kishte thënë Aliev, gazin azer donin ta blinin të gjithin Rusia, Irani dhe Turqia. Turqia kishte vendosur instalimet për gasin n të gjithë territorin e saj, duke mos patur gazin që i duhej. Rusia kishte arritur të pushtonte me korridorin e veriut të dominojë me Nord Stream 2 dhe gazsjellësit ekzistues, donte të kapte South Stream, korridorin e jugut. Në këtë mes kishte një njeri vizionar, ishte Aliev i cili donte që gazi i tij të vinte në Europën Perëndimore, në mënyrë që vendi i tij të ishte i lidhur me vendet e Europës. Në këtë kontekst, në 8 vite, NATO dhe TAP, kanë qenë çështjet më themelore të agjendës time për Shqipërinë, natyrisht edhe pavarësia e Kosovës, në të gjitha takimet me ndërkombëtarët.
Aq sa isha i interesuar për interesin e Shqipërisë, po kaq edhe për interesin Europian. E quaja jetike që korridorin e jugut të mos e kishte Rusia, edhe për ato që rusët kanë bërë ndaj nesh. Pra, për të mundur, për të bërë gjithçka ndaj tyre, ndaj një kancelarie që ndër shekuj kanë bërë shumë gjëra të këqija për shqiptarët”, tha ai per TV-në e tij “Syri”.
Më parë, këtë e tha dhe në parlament.
Gjithsesi, kundërshtari i tij Rama ia ka vlerësuar firmën e hedhur për TAP-in kur qeveriste.
Ndërkohë, ajo që dallohet mes rreshtash në gjoksrrahjen e Berishës, është një mesazh Perëndimit se ai ka punuar për ta, tashmë që është “non grata” nga amerikanët. /tesheshi.com/
