Ndryshe nga ndeshjet e së mërkurës në Champions League, ku të pakta qenë emocionet, katër çerekfinalet e dyta të Europa League-s i kanë patur ato me tepri mbrëmjen e së enjtes.
Tre prej takimeve kanë kërkuar kohë shtesë, e një prej tyre ka shkuar gjer te gjuajtja e 11-metërshave, ku vetëm në serinë e tetë të tyre është përcaktuar fituesi.
Mançester Junajtedi, Ajaksi, Selta Vigo dhe Olimpiku i Lionit kanë kaluar në gjysmëfinale, dhe sot do të mësojnë se kë do të kenë për kundërshtar.
Sfida më pak e ndërlikuar ka qenë ajo e Belgjikës, mes Genkut dhe Selta Vigos. Spanjollët e kishin fituar takimin e parë 3-2, e veç kësaj e gjetën të parët golin. Sisto shënoi për ta në minutën e 63-të, e vetëm katër minuta më pas barazoi Trossard.
Rezultati 1-1 i dha të drejtë Selta Vigos të kualifikohet.
Shalke 04 iu përgjigj me një fitore 2-0 në kohën e rregullt humbjes po kaq, 2-0, një javë më parë në Amsterdam ndaj Ajaksit.
U duk se holandezët morën tatëpjetën dhe pas një goli tjetër të gjermanëve; Caligiuri do të shënonte në minutën e 101-të në shtesën gjysmëorëshe. Gjithçka për vendasit do të përmbysej në minutën e 111-të dhe të 120-të. Golat e realizuar nga Viergever dhe Younes i çuan shifrat në 3-2, çka bëri që biletën për në gjysmëfinale ta meritonte Ajaksi.
Shtesat 15-minutëshe i kërkoi dhe takimi në “Old Trafford”, ku Mançester Junajtedi dhe Anderlehti u vunë përballë pas barazimit 1-1 të një jave më herët.
Mkhitaryan shënoi që në minutën e 10-të, një gol i ekuilibruar për miqtë nga ai i Hanni-t në minutën e 32-të.
Ndeshja shkoi në shtesa, por gjer këtu Mançesteri e kishte paguar shtrenjtë, duke humbur rrugës Rojo-n
dhe Ibrahimovic-in, të dëmtuar. Lëndimi i suedezit në fund të lojës së rregullt ngjan shumë më serioz. Ende pritet një raport mjekësor, me premisat që të jetë diçka e rëndë.
Rashford u bë shpëtuesi i Mançester Junajtedit me atë gol të minutës së 107-të, që dha fitoren 2-1, e po kështu dhe kalimin më tej.
Drama e vërtetë luhet në “Vodafone Arena” të Stambollit, në sfidën mes Beshiktashit dhe Olimpikut të Lionit.
Ndryshe nga përplasja e tifozerive në Lion, në stadiumin e mrekullueshëm të Beshiktashit mbizotëroi një atmosferë shumë më ndryshe, elektrizuese, por brenda caqeve sportive.
Takimi problematik i së enjtes së shkuar pati përfunduar 2-1 për Lionin, e të njëjtin përfundim do të kishte dhe ky i mbrëmshmi, po në favor të Beshiktashit. Shtesat nuk do të prodhonin asgjë, me futbollistët që dukeshin ndjeshëm të lodhur.
Penalltitë do të ishin një histori më vete, një dramë më vete, pasi gjer në serinë e gjashtë të goditjeve nuk ka asnjë gabim. Këtu Beshiktashin e marrin në qafë dy qendërmbrojtësit. Fillimisht është serbi Tosic që gabon, me një 11-metërsh të gjuajtur keq e të pritur nga portieri kundërshtar. Kur Jallet e nxjerr topin jashtë për Lionin, radha i vjen kroatit Mitrovic për vendasit, që po ashtu gjuan lehtë e kuptueshëm për portierin e Lionit. Më tej, pas dështimit të kroatit, vendos Gonalons: tund rrjetën dhe kualifikon Olimpikun e Lionit! /tesheshi.com/
