Me ndeshjet e mbrëmshme është mbyllur dhe faza paraeliminatore e Ligës së Europës. Play-off-i ia lë vendin tani fazës në grupe, në një sezon të gjatë në aktivitetin e dytë futbollistik europian.
Skuadra kryeqytetase e Partizanit e priti në Elbasan Krasnodarin rus. Humbja e thellë në takimin e parë i kishte shkurajuar mbështetësit e të kuqve, që ishin të pakët në shkallët e stadiumit. Pritshmëritë nuk ishin për kualifikim, por për ndonjë rezultat pozitiv. I tillë mund të quhet dhe barazimi 0-0, që i bën një mbyllje të butë largimit të Partizanit nga kjo veprimtari.
Ndryshe ndodhi në Shkup, ku Shkëndija e Tetovës pësoi humbjen më të thellë të kësaj vere në Ligën e Europës.
Paraqitja mjaft e mirë në takimin e parë ndaj belgëve të Gentit kishte krijuar idenë se Shkëndija ishte mjaft pranë një arritjeje historike, pjesëmarrjes në fazën në grupe në Ligën e Europës. Por Genti do të tregohej i pamëshirshëm në kryeqytetin maqedonas, duke shënuar katër gola në tridhjetë minutat e fundit të lojës. Rezultati 0-4 qe i pamerituar për tetovarët, që deri mbrëmë kishin bërë më tepër se ç’duhet. Dy humbjet me Gentin e nxjerrin Shkëndijën jashtë Europa League-s, por ekipi i Tetovës duhet falënderuar për emocionet dhe gëzimin që ofroi në shumë takime të tjera të mëhershme.
Më befasues në play-off qe eliminimi i Uest Hemit nga rumunët e Astrës. Aq më tepër që e njëjta gjë, eliminimi nga Astra, ndodh për të dytin vit radhazi. Por ndryshe nga viti i shkuar, Astra gjendet këtë herë në një situatë kaotike, me probleme financiare, me lojtarët më të mirë të larguar, e njëmbëdhjeta në renditje në kampionatin rumun, me katër pikë pas pesë ndeshjesh.
Takimi në Rumani një javë më parë pati përfunduar 1-1, duke e bërë kualifikimin e Uest Hemit një mision krejt të mundshëm. Por që rezultoi ndryshe. Skuadra e Slaven Bilic-it humbi 0-1, me një gol të pësuar në fundin e pjesës së parë.
U kualifikuan gjithashtu për në fazën në grupe ekipe si Sent Etjeni, Astana, PAOK-u, Sparta e Pragës, Karabaku, Austria e Vjenës, Anderlehti, Hajduku i Splitit, Shakhtari i Donjeckut, Panathinaikosi, Fenerbahçe, Genku, Sasuolo, Olimpiakosi e Rapidi i Vjenës. /tesheshi.com/
