Tre skuadrat e para të kualifikuara për një të tetat e Ligës së Europës janë Mançester Junajtedi, Shalke dhe Krasnodari.
Liga e Europës i luan ndeshjet të enjten, por ndryshe nga zakonisht, tre prej sfidave të kthimit të një të gjashtëmbëdhjetave janë zhvilluar këtë të mërkurë.
Pasi pati fituar 3-0 mesjavën e shkuar, Mançester Junajtedi e fitoi dhe takimin e sotëm në Francë ndaj Sent-Etjenit. Vëllezërit Pogba qenë sërish karshi njëri-tjetrit, por fitorja i buzëqeshi përsëri Paul-it; Mançester fitoi 0-1.
Goli i vetëm u shënua nga Mkhitaryan. Mançesteri luajti me dhjetë lojtarë që nga minuta e 63-të, pas dy kartonave të verdhë për mbrojtësin Bailly, të kthyer në karton të kuq.
Shalke po ashtu kishte fituar 0-3 në ndeshjen e parë në transfertë ndaj PAOK-ut. Barazimi 1-1 i para pak minutave i jep të drejtë skuadrës gjermane të vazhdojë më tej.
Në barazim 1-1 u mbyll dhe takimi në Stamboll mes Fenerbahçes dhe Krasnodarit. Rusët vinin me epërsinë e fitores 1-0 në ndeshjen e parë. Pos kësaj, ata kaluan shpejt në avantazh sot, që në minutën e shtatë, me një gol të Smolov-it. Skrtel riktheu barazpeshën në fundin e pjesës së parë.
Pa qartësinë e duhur, vendasit nuk mundën të bëjnë shumë në 45 minutat e dyta, duke i dhënë fund udhëtimit të tyre sezonal në Ligën e Europës. Kualifikimi qe për Krasnodarin. /tesheshi.com/
